水口飛蝶

聽講水口蝴蝶大爆發,仲有好靚既綠鳳,雖然路程就遠啲,結果都決定要走一趟.

呀,好難搞,今日啲蝴蝶又係全部都飛唔停既,個個都換晒300mm F4,可惜我冇,只好用180mm微距加1.4x頂住.朋友係咁叫我買100-400mm,話有個朋友用佢好好用,不過,佢講緊E mount喎(今日已經冇人識A mount),同埋佢嗰部係A9. 為咗有咁長得咁長,我仲開埋APS-C模式,不過咁就出事,爆晒框,安慰自己,用300mm F4應該會因為太近影唔到.

蝴蝶真係好多呀,不過九成都係爛既,影到都冇用,做乜人地影到嗰啲飛蝦都係紅紅綠綠好靚,但係我見到既就黑媽媽架.

其實今日綠鳳見唔小,不過唔係爛就係唔啱位,唔啱焦平,仲有原來就算唔爛,都會因為唔新鮮而變得淡色的.影咗一大堆,算可以既真係冇乜幾多張.

見得最多既就係鳳蝶,都係黑媽媽冇乜睇頭.

都好見到一隻叫斑鳳既比較有啲花紋同埋淺色啲冇咁悶.今日影既蝶全部都飛來飛去冇時停,搞到我啲大細都唔係控制得咁好,有啲細粒到死,有啲又大到爆框.認真唔係好掂.

荃新天地懷舊展

類似呢啲微型展覽已經睇過幾次,而且展品成日重覆,所以我約人去都冇人理我,但係我見到啲展品係未見過的,所以又單拖去影.

全場最吸引我就係呢個飛機飛過九龍城既場景,好大程度我都係為咗佢而來,我希望盡量影到唔好有人啦,但係角度一係左側一係右側,最後對住裏面係冇咁雜(不過都係雜).影咗至算.至於最大問題背景既人同埋托住架飛機既透明柱,用我初級既PS技巧搞掂咗.

跟住就係搵啲影唔到人既場景,特寫小巴就最易喇.

影埋新老襯亭,又想重拖故技搞走背景啲人,點知效果頗核突,最後決定裁晒佢就算.

影個穿崩既景俾大家睇睇,其實周圍係爆人,咁樣伸部手機入去會影到乜嘢呢?可能係唔會有反光既近距離偷拍大厦單位裏面既相.

樓景都係差唔多,我就影個船景,其實後面都係影到人,不過矇晒唔多覺.

最後影埋個天橋景,景深所限,硬係影唔到好多車既感覺,呢個景係跟實景做的,可惜實景唔用航拍既話係冇可能用咁既角度影到.講開又講,見到呢個展覽嗰陣諗住益吓同事話佢地知啦,點知反應係好冷淡,呢類展都好多啦,冇興趣.到我貼相出來既時候竟然又有好多人問我邊度影,真係益人都要搵啱對象.

誓要闖青山

上次50Km能見度上青山點知中伏,臨尾一嘢大霧搞到食白果,遺憾咗一年,50Km能見度就冇喇,都有30Km,身痕又約人再上去影過.

爬升583m唔講得小,上次行到虛脫咁滯,今次豪一程的士去到青山寺先起步慳翻啲體力,仲預咗三個鐘慢慢行,龜速都唔怕,唔知係咪天氣涼的關係,最後用咗一個鐘就攻頂.剩翻兩個鐘數手指.仲有排先日落,日景都影翻張先.

另一個方向冇咁靚,不過其實比起其他地方都已經好唔錯.

上次超大霧日落影唔成,今次雖然都頗大煙霞,但橫掂等影夜景冇嘢做,就影埋個日落囉,前景冇乜.最後只可以係咁.

當日撞到另外兩個人去影相,呀…其實影夜景嗰度唔係太多位,四支腳架都應該放得落既,咁影完日落就嗱嗱聲去卡位啦,點知原來佢地係冇打算去我地嗰個位,好彩有帶外套,越夜越涷同埋超大風,死火,影來影去都朦,終於縮咁兩節腳架再用個人擋住啲風先影到.當日原來係滿月,順便影埋佢入鏡.

等到個天夠藍影多張就嗱嗱聲換長鏡影黃金海岸特寫,風真係太大,點影都矇,搞得幾搞個天黑晒,影出來得翻一堆光點,宣告失敗,早知就唔駛咁重揹佢上來.嘥咗既時間仲可以用來影另一邊既夜景.算啦,點都好過上次食白果.

蝶季開始

上次牛潭尾出師不利,過得一排應該好啲呱?近近地又去翻我地頭既鳳園睇吓有冇收獲.

又係天陰陰,但出奇地好彩,一入第一期就見到呢對黃色弄蝶交尾,但又好不幸地佢地離立足點頗遠,夾硬伸單腳入去地下又有個窿,只好踏在枯枝上震到死,想拆咗個增距又太細粒,最後要ISO 1250,影咗廿幾張先有一張好啲.

估唔到咁好運,入到二期又被我見到兩隻小灰蝶搞搞吓想交尾,交緊尾被發現就見得多,但今次係由佢地將條尾篤來篤去咁開始的.由接上到移正位成個過程睇晒,雖然兩只蝶就好平凡,但經驗就好新鮮.

聽講一期有機會出罕有蝶,個個去晒等,二期變咗冇人,呢隻我估係普通蝶呱?不過佢開翼我未影過,又好影吓.

正想出翻一期之際,幸運到不能相信,發現今天第三對交尾.雖是極普通的菜粉.但未影過就係好,見佢地好定,就通知一期的朋友,點知佢話冇興趣,想影罕有蝶多啲,咁就算啦.

之後係出翻古家園,因為入來嗰陣見到棵滿開既山指甲好多蝶飛來飛去.但當時有攝影班太多人冇位影,雖然多,但啲蝶有時幾高,影唔到好大隻,不過今次唔同,我想影多啲花入鏡,增加啲畫意.

雖然冇咗攝影班,但個個用二三百焦距既時候,有位師姐竟然用24-70mm,成程超近影,一見到低蝶就算有人影緊,佢都照攝前面,俾佢玩晒咁滯,唯有佢影嗰邊我就去另一邊啦.細細隻配白花都有啲立體感.

唔夠個師姐玩,走翻入一期,影影吓竟然又見到佢,見到有蝶停佢又撲埋去,可能佢朋友都知佢為人,係咁叫住你唔好撲埋去住,你唔好撲埋去住,梗係啦,咁搞法唔止其他人冇得影,連佢朋友都頂唔順,停既唔同你爭喇,實俾你整走,影吓飛鳳啦,24-70mm應該會冇癮唔同我地爭喇呱.

又影model

影完冇耐,但上次想影呢個model落過咗.今次即使係相同地方都冇所謂啦.

吸收咗上次經驗,今次我帶咗135mm來,終於試到佢既壓縮感,後面既牆同草都被拉到好大,雖然我特登影側啲等人唔好知我又去相同地方,但始終都係被人一眼就認出.

上次水平影呢個位諗住唔好頭髮同後面黐底,結果面部大反差搞到張相唔要得.今次試吓高角度影,諗住用湖面做背景冇咁爆,但model表情最面嗰張件衫吹起咗好似大肚咁,結果唔要得.

用135mm用到上癮,我幾喜歡呢張全因個Pose幾經典,要年紀有翻咁上下大先會明白.

換過第二件衫,啲人用完一輪長鏡之後啲壞習慣開始又出翻來,越影越埋,冇計喇,侷住用翻85mm影.

越影越近,尤其呢個位幾窄吓,個個走到埋一埋影直度,我堅持要影橫度,85mm都唔掂喇.要出50mm,次次都硬係要影埋呢啲咁既位,我都係玩吓,影到都唔靚.

最後影埋呢個花花背景就收工.其實我想用另一堆花做前景,model夾喺中間會比較有立體感,不過呢啲人群活都控制唔到咁多喇,就算簡單要model望你都要等吓.

又中伏Comic world

無意中見到呢個活動.估佢應該好似動漫展咁有cosplay,有模型可以影,都可以係一個節目.

通常呢啲活動都係會展搞,今次竟然係展貿,規模應該係細啲,弊,模型係冇既,cosplayer都係冇既,成個場都係賣嘢,要睇模型可以走埋啲賣嘢既地方睇,不過磨爛蓆咁影我就唔係好敢,死啦,唔通要掉頭走,咦,舞台好似有表演,而竟然係冇乜人霸頭位影,咁我自然唔客氣企正座位後面中間位置,有歌有舞都幾熱鬧.

表演一隊接一隊,啲衫有啲唔同,但其實跳舞都係郁吓手,郁吓腳就算,唱歌只係咪咀.

以為呢啲表演都係大家為興趣玩吓,原來唔係架,啲舞蹈員跳完舞會有講話時間,其中一隊係呼籲啲Producer俾機會佢地演出,仲話佢地跳開K-pop,打咗個突,香港真係有呢啲市場嗎?

場場都差唔多都幾悶,所以影咗幾場諗住走,出到外面竟然有cosplayer影喎,不過得幾個而且服裝唔多落本,呢組已經算好,有架生,地方又窄,燈光又差,認真麻麻.

咦,好多人圍住影喎,原來係靚女,唔怪得咁受歡迎,不過位就真係麻麻,大背光又欄杆斬腰,求其影咗幾張就算,早啲翻屋企.