場地單車賽

上次影室內單車由於要交相唔敢咁搏.全部高速快門影定格就算,事後自己都覺得唔係好接受得到.今次自己去決定玩晒慢快門.

室內跟室外最大既分別係室內圍欄好高,用長鏡好易會被圍欄阻住.所以好多人都會走近圍欄用wide鏡影,但係咁會影到頭車後面既車好細粒,而且咁近玩Pan鏡係超高難度.我決定要就到用到85mm影,要影到後面好多車,全個場得8個位可以做得到,就係四個彎位既出彎位.我分別試咗大直路出半圓位同埋半圓位出大直路.前者係唔得的,圍欄太高,冇可能用到長鏡,除非你接受隔住玻璃影.後者都唔易,好多時都影到欄杆,實在嘥咗太多時間,我決定照影,最多事後P走啲欄杆.好在頭段係繞圈賽,有幾十次機會,點都影到啲.

跟住我又試吓135mm,太爆好難影,仲有企吓其他位,最後真係得4個位可以影到我要既畫面,都係唔好搞太耐,陣間繞圈賽玩完就弊,翻屋企睇翻啲相成功率真係頗低.因為轉彎到出彎嗰吓相機要由斜轉直,好唔慣,下次再有機會影應該會熟啲.而且我發覺有小小欄杆都唔係太差,都費事P走佢.

都話咗唔好試咁耐架啦,群揪一陣間就玩完,得翻啲小人既比賽,冇計喇,只好影吓普通既橫向Pan鏡,缺點就係好難會影到好多架車既畫面.不過成功率大增,甚至可以試更慢快門.

繼續都係小車畫面,呢個時候有人話就快完,唔係呱?個賽程表去到下午好晏個喎.睇真的,賣桔………原來後面嗰啲全部係頒獎來架.草草收工添.

出師不利

經過漫長既冬季,驚蟄已過,又係微距鏡出動既時候,恨咗好耐想影既鬍鬚仔(有鬍鬚既蝴蝶)終於有人肯帶隊.牛潭尾呢個地點好神秘,諗住不惜腰間錢坐的士去牛潭尾係冇用既,完全都唔係嗰個地方,正確方法係去翠巒再左轉入小路去到盡頭再自己行上山.跟的士或者小巴會到既牛潭尾風馬牛不相及.

由於前一日有非常罕有既金鳳蝶出現咗,搞到今日成個山頭都係人.不過似乎已經走咗,最慘就連鬍鬚仔都唔知去咗邊,結果只有飛來飛去既柑橘同青鳳,一來我唔係好影得掂,二來成班人迫在一個小位都係唔好阻住人.結果見得最多就係呢隻叫做小三既蝶.聽講都罕有,但似乎都幾多吓,超難影.佢既習性永遠都係停在亂草中央,點影都唔靚,背景雜就一定,好多時連前面都有草阻住.搞咗半日得一張叫做好啲,不過都同背景黐埋一舊.冇乜收獲個個話走,咁就走啦.

荔枝角夜景

市區夜景影得比較多係荃灣,青衣一帶,荔枝角因為唔多識路既關係冇乜點去.而且好似平地多,冇乜制高點.好彩人脈夠,有人介紹好地方,又有得玩.

拍攝點在商業大厦頂樓,平時真係唔多敢入去.原來升降機係可以直接到頂樓,去到行咗個圈,拍攝點就只有一個突出去既位,其他位因欄杆外仲有平台好阻.好涷,走翻入有玻璃門隔住既電梯前面等天黑.諗住咁涷冇人上來啦.都有幾個人上來食煙.終於等到天黑,係咪好奇怪點解唔影埋條路個彎位?實際上係影唔到的.被大厦遮住.

嗱嗱聲影埋另一個角度,呢邊差好遠喇,避咗平台,避埋兩邊既大厦搞到好迫,冇所謂啦,夠方便嘛,影完落街一陣街就到地鐡站,翻屋企食飯都夠時間.

中伏元宵綵燈會

元宵節有兩個節目可以揀,一係去影戰艦訪港,今次停碼頭,有機會影到日落或者夜景加戰艦,一係就去影市區元宵節綵燈會,戰艦係最後一日,留到幾點係冇資料,有機會去到乜都冇,綵燈會嘛,初初搞都幾落本,除咗外援,仲會有啲二線歌星,都幾好氣氛,後來縮本,冇咗歌星,所以我都冇去好耐,今次睇廣告見到有噴火,呢個我在九寨溝影得唔好,咁就一於重反綵燈會.

其實除咗市區綵燈會,仲有兩日在新界舉行的,內容一模一樣,不過只有市區有樓梯級觀眾席,前面既人頭冇阻得咁應.為咗霸中間位,早咗一個鐘到,前面只有十零人,比影花車舒服得多.一開始既交響樂表演真係幾悶,之後仲要致開幕詞,幾乎瞓着.

終於悶完,到新疆歌舞團出場,大鑼大鼓,係幾熱鬧,啲衫都幾靚,不過除咗咁就冇喇,只係成班人走來走去,Fing手fing腳咁囉.

唱歌就更加悶,唔知佢地唱乜,唱功應該唔錯既,但啲歌太老套喇,大家都係等佢完啦.

雜技應該會有啲睇頭呱?我覺得都係比較靜態,如果有半空轉體270度加翻騰三周半會精彩得多.

雜耍更加見慣見熟,冇晒新鮮感.

又係跳舞,好彩有小小跳躍動作.

主要節目都係跳舞,呢個叫做有小小難度,啲碗係裝住水的,但除咗限制咗頭部既角度之外,好似同普通跳舞唔係太大分別.

時間一分一秒咁過去,幾時有噴火睇架?個個表演都差唔多,千篇一律鬼咁Hea,上一隻舞啲演員入後台換件衫又出來跳過,睇睇吓啲人都開始走.各位,今日既節目已經表演完畢,祝大家元宵節快樂,哎呀,冇噴火真唔好出相誤導人啦,咁又冇咗一日寶貴假期.

霧霾的活動

好想去影吓風景,不過唔係落雨就係能見度低.之前有朋友話想試吓影model.咁一於利用呢個空閒時間陪佢去啦.

跟據以往經驗,用wide鏡既人太多,50mm穏陣,85mm有時都會用到.點知今次竟然個個用長鏡喎.真後悔冇帶支135mm來,用135mm影全身人像係好夢幻的,但大前題要冇人阻,否則只可以影大頭.今次嘥晒,而且好小model肯瞓,多數都係直立人,好在85mm其實都唔差.

之後去草地,由於啲草唔係好長,即使水平影都唔會好夢幻,瞓地又好似太誇張,終於應用到反mon既好處,部機直情放喺地下影,穏定性係差啲,但日光日白快門夠快都冇乜問題.

瞓又影完,坐又影完,影埋蹲低.其實好難搞,白色裙差啲啲都爆光.效果麻麻,總算背景唔會太亂.

又到換衫,唔知點解次次都要揀埋晒啲橫街窄巷影,一來亂糟糟,二來都冇位影,個個迫埋一堆,只好希望快啲影完換位.

除咗窄巷,好多時都鐘意搵幅牆挨喺度,唔知有乜好影,相比之下,樓梯已經算係唔錯,起碼唔駛硬企繞埋雙手.

白晝兇鈴

已經係上年11月既事,無啦啦推出老人家肥雞餐.咁多個選擇都係好既,話晒係自願,唔係強迫.不過.........如果反應唔理想,就會有第二波強制裁員.咁即係侷賭.合資格老人家百幾個,有五十幾個選擇食雞,諗住都夠數啦,原來唔係,仲要炒多三十幾個先夠數...

新年流流,各位同事,大家聽完呢個簡報會後唔該翻埋位,如果你被選中就會收到電話叫你上人事部攞埋啲尾數.成個辦公室都充滿恐佈氣氛.一有電話響就好緊張,而我....竟然有電話入,妖,星展銀行,你去死啦,忍唔住爆咗粗.時間一分一秒過去,諗住都完喇呱?估唔到茶水部阿嬸係最後一個,睇住佢上完人事部翻來喊晒同同事道別,卒之搞到成班女仔都喊埋.有冇搞錯呀?炒阿嬸慳得幾多錢?
雖然我冇被揀中,不過我呢啲老鬼睇怕我都擺唔耐,希望有幸能夠捱到下一次肥雞餐啦.