2018年12月28日 星期五

學人睇設計

網上見到有個機械人大戰比賽,仲加埋有設計師作品,好似幾有趣.


去到門口,有公仔喎,影翻張紀綠相先.


其實設計既嘢我唔係好識,總係覺得好多都唔實際,得個樣,好似呢盞燈咁,真係幾靚既,但係我寧願佢光啲囉 :P


這應該是兩隻貓吧?不過尖頭利角放喺屋企應該好危險,而且香港地方貴,放舊咁既嘢好似冇乜實質作用,有位不如放多隻超低音好過 😝


另一邊擺咗啲微縮展品,有好多之前已經睇過,順便影咗幾張就算數.我覺得新意唔係好夠,成日都係街景,大厦等,可以整吓第二啲,設計就係要有創意嘛.


整天最能引起哄動就係佢,有人腳既恐龍,大家瘋狂追住佢影相,室內暗佢又走來走去,仲有好多電話阻住,結果一張都影唔到,等咗一個鐘佢再出來,今次有經驗跟住佢領隊喺前面截佢,最後出到門口終於可以影到佢.


之後仲一路跟到佢走翻入休息室.最唔好就係啲人一啲都唔驚囉.再走去睇睇節目表先記得有機器人大戰,死火,老人痴呆症,完全冇咗回事,得支24-70mm,只好早啲走啦.

2018年12月23日 星期日

無無謂謂大水管

在網上見人地在大水管影人像相,model坐在水管上,背景是仲延的水管,覺得好靚,見到有呢個團,自然想copy cat一翻.


Model衣著其實同大水管啲咁工業既景有點格格不入,工業環境好硬朗,Model就著得好斯文.有啲奇怪感覺.


着住高跟鞋行工地都好似唔多妥,硬係覺得Model正面個面型好似有啲方,所以我都影晒側側地既.


我有啲擔心著成咁陣間點樣上大水管,好在係會換衫既,不過咁曬著到咁厚唔知捱得幾耐,難得啲wide鏡黨去晒另一面,換支135mm玩吓.扯到背景咁大既感覺係85mm做唔到既.


轉去草地影背光,又俾啲wide鏡黨阻住,侷住換翻85mm影,我要將閃燈出盡先影到啱光暗畫面,但我竟然見到有人唔用閃燈影,睇怕係想影剪影 @@


有位師兄攞咗支120-300mm F2.8來玩,好極長鏡派多咗支援,當日有位wide鏡黨完全唔理長鏡派,影完睇吓又影,卒之Model都頂佢唔順,叫佢不如俾後面用長鏡既都影吓佢先肯行開,我都乘機用吓135mm啦,不過.......到收工竟然都冇上過大水管喎,咁我地做乜要來大水管呢?仲要唔係去近上水站嗰邊,特登搭的士去到虎地拗喎,莫名奇妙.

2018年12月19日 星期三

足毽攝影

好耐冇影過呢項比賽,最重要係未用全片幅影過,以前影落嗰啲都冇乜幾多張係OK.

 
冇咗交相既壓力,防守或者就咁企喺度踢既我就唔影喇,專揀跳起進攻既先影,個體育館咁啱有啲一級級既觀眾席,可以走上最高一級影,唔駛下下俾個網遮住或者要側影.你動作幾得意,就搵你開齋.
 
 


唔明佢點解可以跳得咁高,就算唔玩踢毽都可以走去玩跳高哦,而且佢正面跳比較容易影.


可能我周圍擒高擒低,引起咗工作人員注意,先生,你係乜水?係咪大會攝影?唔怪得佢,因為我都冇見到有人有攝影證,於是我答佢,雖然我一個影十個,但我只不過係一個香港人.你就唔得啦,掂網既.


嘩,見到有人打倒掛呀,優先影佢啦,好多隊進政都頗單調,攞分集中晒一個人,好似足球小將有波就要交俾戴志偉咁,影相自然Mark實佢,不過防守球員都有相同諗法,搞到好多時都遮住我,哎呀,好彩遮唔晒.


呢位短髮人兄我留意咗好耐.之前嗰場已經去定晒位等影佢,點知一換邊佢就被換走,搞到我冇得影.好彩決賽再見翻佢,佢呢吓倒掛好勁,明知佢咁踢都擋唔住,俾佢攞好多分.亦都好難先影到冇人遮住佢,不過隻腳就冇咗一忽.

2018年12月12日 星期三

又影舞龍舞獅

上網見到元朗體育節好多節目,排球,啦啦隊同花式跳繩都好想影,不過佢要攞票,要麻煩朋友特登幫我攞,可惜……票背面寫住唔俾影相.呀,其實可以搏搏矇照影既,上次荃城舞動都話唔俾影,結果個個都照影,但係咁遠,陳間唔俾影就好掃興,又咁啱見到九龍公園有北獅比賽,咁就改變行程.穏穏陳陳實有得影.


北獅係精彩過南獅好多的,有好多翻騰,跳躍動作,而且佢比較似真獅子,我唔係太熟,硬係俾佢失驚無神跳咗影唔切,結果得呢一張成功,打跟斗嗰啲就冇喇.


人跳之外,獅子跳得仲密,機會多好多,實會影到,只要正面向住你同唔好俾獅子毛遮咗塊面就得.


呢個姿勢平常人腰力應該冇可能做到,實際上佢地應該都唔得,做到只係因為轉緊可以利用離心力.


下午到舞龍,舞龍有兩種,一種係擺姿勢,會以慢動作進行,將條龍捲來捲去擺到靚靚,容易影,但冇乜動感,另一種就係依家影既速度賽,其實事先我唔知係邊種的,不過我記得北獅多數係同速度賽一齊,已經影過一次,開段會走吓左走吓右,用135mm就可以影到連埋人.


或者等佢走前排影半身.旁邊啲人見我係咁左左右右搖來搖去可能覺得我係傻既.

2018年12月7日 星期五

殘念列根號

朋友又叫我去三支香影航母空鑑,今次係美國列根號,吸取上次三支香影的經驗,太遠係好難影得清,影完仲要裁好唔掂.我記得上次好似見到隻鑑就停喺南灣角出面,就問朋友要唔要試吓.去到小巴站,已經知道冇搵錯地方,見到都有幾個人攞晒架生,仲有人問我地係咪去影航母,仲教我地同小巴司機講話去影航母就得.


仲諗住影油庫嗰度落,原來要過多小小,冇站的,見到一大堆人,直情唔駛上山,仲驚腳架重添.不過.......來錯咗時間哦,大背光,早知朝早來啦,冇計,照影,用盡500mm都影到好大隻,不過執餐死.


背光就背光啦,整翻個日落加航母先得,可惜太陽都係離得太遠,影到都好細粒,禍不單行,水流改變,隻鑑變咗正側面,200mm都幾乎爆框.


側邊有個人話我聽唔止得一隻鑑,遠處仲有隻細啲既,嘩,超遠呀,用盡500mm再裁都係細隻,最後只能這樣.


仲有最後一點希望就係夜景加航母着燈,至於結果,你地都睇到啦.隻鑑越飄越埋,200mm已經爆框,侷住影一忽.今次真係全軍覆歿.

2018年11月30日 星期五

港珠澳大橋攝影

未通車前去影過一次,天氣唔好都算,反正影夜景差唔幾,不過淨係帶咗支24-70mm,原來唔多夠長,要開APS-C mode,咁通車就再去影多次啦.



天氣仲衰,灰灰矇矇咁,天氣報告話會好大風,咁上山又好斜,又要行粒幾鐘由東涌去深屈,就捨wide鏡帶重型腳架,我計好晒架喇,85mm1.4x就啱焦距,……….天有不測之風雲,明明好灰,突然都會火燒天,同朋友講你唔帶wide鏡小心會後悔,點知我自己就真係冇帶.好彩我有帶咭,黐佢部機影翻兩張唔駛食白果.



跟住就係等夜景,仲諗住有好多車軌添,原來係好疏落,都費事慢慢儲來夾,就咁影完就算,其實仲有幾個位都可以影到大橋加人工島,不過影到成條抛物線咁就係呢個位,老遠好細光光地嗰度係另一個海底隧道出口.影呢兩張相都幾貴架,由於過咗7點冇船走,侷住又係打的,好貴.

2018年11月21日 星期三

花式溜冰隊列滑

繼滾軸溜冰後又有溜冰,不過今次係真冰,而且係未影過既隊滑.

 
Mega box最大問題就係大位係大背光,侷住去窄位影,這個決定都正確,隊伍要有比較長位先夠距離發揮,不過成大揪人好難搞,只好影一忽.
 


反而有啲小組既比較好影,原本都想挑戰難度玩吓pan鏡,不過佢地動作好鬼飄忽,時左時右,速度又唔多夠快,搞來搞去效果都係麻麻,而且睇大會程序好似得個零鐘就完,即係得幾隊,所以都係唔好太冒險.


難得咁大堆人走埋一齊,一張影晒佢,仲係背面轉身,都算有啲特別,坦白講,當天選手水準頗一般,冇乜高難度動作,都係普通咁滑來滑去就算,


最後小朋友呢張係大大背光,背景幾乎爆晒先勉強影到唔黑面,冇計喇,影raw慢慢搞,最後只能這樣.

2018年11月16日 星期五

滾軸溜冰攝影

這個項目我未影過,所以得知有比賽後我就將佢排咗最優先位置去影.

 
比賽在公園球場進行,已經都好早來,但好位一早冇晒,連大背光位都滿人,真係估唔到,反而側光位仲有小小,事實上塊面都係陰影,一出場係小朋友組,速度比較慢反而仲難搞,不過佢地全部係賽一個圈,好快就完,我初初企喺度影,但地面太淨色,佢地又跑得好散,搞到好似冇乜效果,幸好手腳郁動都有啲動感.
 
 
咁又試吓出凳仔,低角度係影到背景夠花,但佢又同後面啲跑手黐晒底,我到影完晒先晃然大悟,其實乾,淨背景啱啲,只要啲人走得夠近,,就可以影到一大堆人又有動感既畫面,就好似單車館影單車繞圈賽咁,但啲人又散喎.
 
 
試得兩試上午既比賽就完咗,下午光線既方向改咗,正光位冇遮冇擋曬死,冇乜人同我爭,一開始竟然係單人賽,都好,影佢地起步Fing晒手腳既畫面.
 
 
同我一齊來既兩個朋友已經走咗,佢地話下午長途賽會好悶,我唔同意呀,不停轉圈先多機會影嘛,呢邊背景仲冇咁花.
 
 
這種影運動員剛出彎的構圖事實上比長距離一條直線上的動作難,一來出彎時速度比較慢,快門真係要夠慢先夠動感,二來運動員係有小小向你衝埋來,即使仔節奏好啱,但如果相機既對焦系統一下唔生性,咁就一切都白費晒.我都因為咁炒咗唔小相.
 
 
去到直路先開始影就易得多,但如果啲人走散晒,就會影到單一個就來衝出畫面既人,變得好怪喇.
 
 
 


2018年11月10日 星期六

鳳園收爐

天氣開始變冷,蝶季差不多完結,襯住仲有得影去翻次.

 
蝴蝶是有的,但好多都已經影過無數次,又唔係靚位靚光,影都只不過係過吓手癮.直到見到佢,原來我係未影過佢的.而且佢身處既地方幾特別.佢又唔多郁真係啱晒.我大大細細唔同構圖影咗一堆,最後覺得應該要表達到背景一層層既感覺,所以放棄大隻特寫揀咗呢張.
 
 
行來行去都係冇乜發現,終於見到好難影既飛蝦,激死,夠光嗰啲飛得好遠,影得好細粒.暗位先夠大,於是………ISO 3200,雜訊大爆發,而且背景麻麻,叫做做個紀錄,下次,可能係出年先影好啲.


2018年11月6日 星期二

西九攝影

高鐡開咗,點都要去襯吓熱鬧,加上又係市區,咁方便冇節目就啱晒啦.


個站形狀都幾得意既,好多幾何圖形,有啲似深圳體育館,不過我又唔係好大興趣影呢啲抽象相.咁一心就去等影個站既夜景,之前有諗過去中港城影完日落先過來,實在太趕喇,而且個天好多雲,點知臨日落個天真係紅紅地,一個箭步跑上觀景台,九秒九出腳架影,景就麻麻,叫做有啲紅天.


影完日落就係夜景,呢個位其實有小小犯規,要經過花糟旁邊小路,希望陣間唔好撞到工作人員,日頭唔好講人,去到咁啱真係有工作人員在休息食嘢.仲好以唔趕時間有排坐,咁點好呢?再等又會天黑,硬著頭皮咋唔知夾硬行入去,好彩佢冇理我.個景其實冇乜驚艷,馬馬虎虎咁啦,勝在影完行過圓方就有大快活,翻屋企唔駛搞到十一二點囉.

2018年10月31日 星期三

單車節

原本冇打算去,因為佢唔係繞圈賽,好大機會好似渣打馬拉松咁,只係一下就走晒.後來朋友話我知,下午係有繞圈賽的.咁就去睇睇啦.


事前做定功課,認定帝國中心對出係最理想位置,因為對正出彎位,Pan車之餘可以見到後面長長車龍.預早一個鐘去卡位,不過…….大會劃咗個位自己用,算啦,其實太近條路都好難Pan,咁就走過對面內彎位試吓.熱身時間,用85mm影差唔多,背景麻麻,最衰係好多雪糕筒同膠帶,架車近小小都會被遮.

咁搞唔係辦法,走去搵吓其他位,好難搞,大部份位都係黐實條路,車直情在你面前過,要用wide鏡影到變晒形之外準備時間太短超高失敗率,終於搵到過轉折位後上天橋既路邊,可以隔一條馬路影,用135mm剛好,頭一浪超大堆頭,我諗有過百架車同時出發,車速又快,亂晒大籠,頭車過咗之後全部黐埋一舊,唔理咁多,求其影埋去,中間就中間啦.


條路另一好處係佢夠長,可以伸部機出去用長鏡影正面一大堆車,用wide鏡千萬唔好伸出去,會撞到車手,講係咁講,超多電話黨伸部電話出去影,我都要等咗好多轉先等到冇電話喺前面.


由於賽道好長,唔係好驚行開咗會冇咗個位,我又試吓去轉折點位置影啲車轉彎上天橋,呢個位有啲似帝國中心,可以影到車出彎時後面有一大隊車跟住,可惜大會欄到好出,用500mm影都未必夠長,而且因為轉180度關係,車好慢冇乜效果,我得135加埋1.4x再勁裁,最後都係麻麻,啲相幾乎俾我剷走晒.


翻翻去天橋位,呢個時候有追逐賽,一小隊一小隊咁出發,好影好多.每次單車比賽之後例牌有一大堆超慢快門,成張矇查查既藝術相.我事實上都會影到類似既,不過會全部剷晒,更加唔會貼出來,對於我來講,張相清楚只係最基本要求.


Pan鏡係有啲難度,但只要多啲練習同快門適可而止,唔好爽慢,點都會有啲成功既,我都有十零張OK,不過貼相再高景界係除咗唔清楚,構圖重覆都係沉悶既,所以我貼埋呢張就算喇.

2018年10月26日 星期五

行路上山頂

山頂講緊係太平山頂,由金鐘纜車站行上去唔知係咪由地面高度計起呢?仲高過青山應該行唔掂,原本目的係去白加道纜車站影纜車加維港構圖,不過就咁由山頂行落去好似太簡單,都想影啲其他纜車站既相,高就高啦.


入口唔難搵,纜車徑就係,好快就第一個站,影翻張正面照先.


啲路都真係好斜,好彩係樓梯,爬升得快啲都冇問題,行到咁上下可以見到舊款纜車被棄置一旁.


整張直情喺旁邊影既先.夠晒大架.


去去下忽然冇路貼住纜車,侷住行普通山路,由於要減低斜度改用之字路設計,認真攞命,行完一個之字又另一個之字,無窮無盡咁,一路行到白加道站先再見到纜車.度好位陣間夜晚先來影,直接行到山頂廣場坐吓回下氣先,其實就咁去總站旁邊都可以影到纜車加維港,但纜車太近影到變晒形.


來到今日主菜,山頂行翻去白加道應該10分鐘內,位置唔多,最多放到兩支腳架,要影到架纜車係唔可以靠長時間曝光的,因為佢一路郁,只可以靠閃燈.而且要開大光圈,高ISO支燈先夠力,一張過唔係唔得,背景會幾粗,而之後既背景同路軌會半透明咁顯現在車身上,都係影張多夾上去穏陣啲喇,車廂啲人可能笑緊我,個傻仔唔識影相,用閃燈影景.