2017年4月29日 星期六

景深的疑惑

早前睇到個好特別既理論.就係全片幅既APS-C模式景深會多過APS-C相機.咁奇怪,理論上應該係唔會有分別.好奇之下走去計景深既網站用同一焦距,同一對焦距離計一計........竟然係真喎.會唔會個計算有灟洞呢?又或者有另外一個因素.........


都係自己做計實驗穏陣啲.要從單一物體睇吓景深有冇多咗比較因難.我決定用兩個盒,咁我就可以調節佢地之間既距離,用其中一種方法影到啱啱夠景深sharp晒兩個盒,之後再比較佢地既分別就可以得出結論.要換相機又要距離完全唔變用有腳架環既微距鏡就得.只要用腳架,理論上換機身係完全唔會郁到支鏡.


先用A99II既APS-C模式影,去到F11景深就可以覆蓋到兩個盒.為咗睇得清楚啲,放大100%來睇.


再用A77影,理論上係完全冇郁到,但我發理構圖係輕微移咗位,應該影響不大呱?由於像素唔同,我再將A77既影像縮到到A99II一樣,奇怪的事出現了,景深真係好似比較淺,左邊對焦位置是差不多,但右邊既點點比較矇.....


再試吓收到F13再影,景深比較接近了,唔通真係有APS-C模式比較多景深一回事,咁我要諗吓係咪用A99II既APS-C模式去影微距先得,因為用完都有超過1700萬像素,仲多過A700.但係就賺咗景深.......諗深一層,今次測試用既光圈太細,分分鐘受繞射影響結果,要搵次用大啲光圈再試吓先得.

2017年4月24日 星期一

南嶺影蝶

影蝶既朋友開始唔太滿足本地影過既品種,要衝出香港,大陸甚至泰國,馬來西亞都有佢地既足跡,對我來講俾幾千蚊淨係去影蝴蝶實在係不可思議,或者我仲未有咁發燒,但係去大陸近近地我都想試吓,襯住幾日復活節假期,就跟佢地去韶關既南嶺試吓.
 

出師不利,低估咗連續4日假期既力量,超多人搭火車,直情冇辦法上到車,好彩好快有一班空車先上到.去到上水又係變咗沙甸魚.好不容易過到關,竟然用咗個半鐘.地鐡多人到唔駛旨意搭,的士站唔多人喎,仲有一線希望,點知車一樣唔多.結果係趕唔到高鐡,諗住去轉下一班車啦,企位都冇所謂,轉票條龍又係沙甸魚,用咗一個鐘埋到去既結果係......企位都要明天兩點半先有.方法就係改搭下午兩點48分既......慢車,車程要四個半鐘.最後再誤點半個鐘,7點幾先到韶關,再搭個幾鐘頭車入南嶺,到步接近晚上九點.第一日就咁廢咗.臨上車前唔知做乜好去咗車站附近影蝶,平時唔願影既都影餐死,苦中作樂.


沒有最慘,第二日竟然係......落毛毛雨加涷天氣,到處靜英英.走入公園內餐廳避雨居然見到綠弄同埋呢隻第一次見既斜紋綠鳳.綠弄啲位古古怪怪我就冇興趣影喇.呢隻大家用棵草引咗佢上來再用餐廳既凳夾住擺拍.室內超暗,帶來諗住做燈架既腳架終於有用.最後用咗一秒快門.之後只有一啲東方菜粉之類普蝶,第二日就咁又廢咗.


第三日天色終於明朗小小,食過翻尋味,又去餐廳,不過係冇嘢,在途中見到好多蛾伏在樹上,呢隻超大,整個大特寫先得,冇乜人吼,呵呵,又可以開腳架影.原本諗住啱啱Fit晒成個蛾頭就算,但這幾乎是mission impossible,波頭並唔預你做咁精準構圖,一鎖緊嗰吓構圖係會大變的,放大率越大越誇張,我呢張構圖時要就到個蛾頭啱啱在畫面外,鎖緊之後係乜就乜,好難再細改.


終於有好消息喇,停車場發現今次目標鋸灰蝶,唔算好特別,係毛比較多,但係佢好合作,唔多郁靜靜在飲水,放水.人人都影到佢出水珠,有人仲影到兩粒,皆大歡喜.由於在地上,要扒地先影得靚,又落完雨,結果個個濕晒身.


到咗食飯時間,點知餐廳門口又出現好嘢.背景就.....都照影架喇,搞到啲飯菜擺晒喺度冇人願食.


停車場又有好嘢,係非常活躍,飛來飛去既綠色類似鳳蝶品種.哎.....其實唔多啱我,原本都幾有挑戰性,燕鳳都係咁影啦,但大家都驚整走佢,只用遠距離攻擊,其他人用300mmF4都影到粒米咁,我得180mm影完我都係會刪除就算.自己去搵食,呢隻眼蝶應該都未見過.橫掂得我一個影,整走咗都冇所謂.可以試吓夜攝咁雙閃燈,冇耐之前我已經改咗用腳架代替燈架.除咗真係可以用來上相機慢快門之外,做燈架都有好處,正式燈架調節高度係快而且可以升好高,但只適用於平地,地下一斜就死.腳架路面適應力大好多.用引閃習慣亦改咗,之前係機頂燈TTL,飛燈用手動.人多時呢個方法好弊,背景亮度唔啱既話要起身搞,一來容易驚動目標,二來你搞得幾搞排隊既人就會有說話講.兩支燈係正好多,唔理天色如何,用到F11都可以用1/200秒快門影.其實仲有幾種未見過既,不過都影得唔靚,今日真係報仇咁報.


來到最後一日,唉,又係落雨,仲幾大添,只好去好運餐廳睇吓有冇運啦,真係有隻小東西喎,今日靠佢喇,腳架又有用,其實隻蝶黑媽媽冇乜細節,不過大家都樂此不疲,影完遠又影近又改位置再影,鬼咩,都冇地方去.個長假期就咁就玩完喇.雖然諸事不順,不過遇到幾隻未見過既品種都算有收獲.

2017年4月19日 星期三

執相二合一

用Layer Mask夾相最大問題係遇到邊位好岩殘,光暗又完全冇漸變既位置,筆刷一減小就會出現唔自然既夾位,照用大筆刷就會好似用漸變瀘鏡咁某啲地方擦過龍或者擦唔到,應該光既地方暗咗,反之應該暗既地方就光咗.但係佢效果最自然,每一個部份都係真實影出來而唔係經過電腦推光,壓暗.為咗解決呢個問題,我開始結合兩個方法,用推Shadow, Highlight處理最難搞既邊位,再用Layer Mask擦出最大片既真實拍攝部份,效果不錯,但反差太勁會好多noise.馬草壟嗰輯個魚塘就搞到鬼五馬六.


又到影橋的季節,即係過咗七點先天黑,青馬橋要七點先開燈.意外地有日落,重施故技影幾張翻去慢慢夾.Paintshop Pro都有HDR,睇吓夾成點.效果都唔錯,由於冇乜移動物體,鬼影問題唔大,效果就始終有啲卡通.


用翻先前思維,開Layer Mask盡量將真實部份夾翻上去,可能有人會覺得太清淡,不過睇得太多勁橙既日落相之後,反而覺得咁比較自然.天空部份我沒有夾太多,用翻大部份HDR出既部份,因天色不佳,用埋真係會淡如清水,如果當時夠好天,遠處有小小籃既話就一定會搞埋佢.


最後梗係要影埋個夜景啦,我已經觀察咗好耐,呢個時節可以等到七點開燈,最後七點十分影完,走得.有點可惜係旁邊既樹高咗好多,遮咗個迴旋處,又或者行錯路?仲諗住今次影wide啲補翻上次冇影既迴旋處,估唔到都係影唔到,只嘆沒緣份.

2017年4月13日 星期四

飛燈的遺憾

又到洗錢既時間,由於Sony轉咗燈腳,舊有既引閃用唔到.又要買過舊,而Sony終於出咗自家引閃,不過價錢係人地幾倍,頂部又冇得插燈,買嗰個精神都有問題.


之前諗過淨係出兩支Cactus燈係唔掂,會冇咗高速閃.唯有又出兩舊引閃,佢係冇分邊舊引,邊舊接的,上面有粒掣揀,要有既功能都有,可以遙控輸出大小,連焦距都得.不過就冇TTL,都OK啦,我事實上好小用TTL.


仲要加多支燈,平平地買支Cactus算數,呢支係新版,舊版再平幾舊.但新版回電快舊版三倍.好彩冇就咁買兩支,除咗冇高速閃之外.原來插機頂係認唔到的.由於Sony個觀景窗係電子,如果只用閃燈做光源的話,畫面會添黑一片,無法構圖.


刨完說明書,原來支燈有光引閃,這是我恨咗好耐既功能,就算只玩兩支燈,閃燈本身已經要8粒電,引閃又4粒,加一套士啤電,即係要攞24粒電出街,仲要裝裝卸卸,實在勁麻煩.如果光引閃既話可以帶小8粒電同兩舊引閃,個棚都唔駛搭咁高.故障時Check邊舊冇電或者設定都方便啲.喺屋企室內試過好遠都引到.戶外強光下我知會有問題,但我一般唔會曬住用.高高興興攞去影蝴蝶.用得好仲可以同其他人共用.咦........明明環境唔係好光,硬係引唔到,搞得幾搞索性收翻埋,白攞.影白色蝶如果正光好易黑底.所以會盡量背光影再用閃燈補光,有飛燈既話就可以加光背景,取景就會自由好多.冇計,唯有又係好似平時咁背光影.


死心不息,朝早可能太光干擾到,咁夜攝實得喇呱.咦,一樣唔得.咁死喇,夜攝冇得背光影,即係變晒黑底.唯有試吓改變吓角度,盡量等主燈直接照到個感應器,搞得幾搞真係得喎,聽到Do一聲訊號接收確認.但係咁樣擺位好有限制,明明屋企亂咁擺都得,估計係室內有牆壁反射,戶外空曠變咗真係冇光到感應器.


影得唔高興決定放棄,就係咁衰,臨走竟然見到咁正畫面.不過佢地走來走去,去左面又要扭翻支燈過右面,去右面又......扭來扭去乜興緻都冇晒,時閃時唔閃真係玩死.好難得先影中一張竟然唔夠光,想再較目標已經走咗.唯有靠後期搞,鬼咁多noise激死.嘥咗個好機會.結論係我唔會再玩光引,寧可麻煩啲用翻無線電引閃.點解Sony閃燈咁落後架?Canon買兩支燈就搞掂.

2017年4月7日 星期五

血拚東京

朋友聽到我話去東京就話冇乜嘢玩,只有買嘢.點會呀?不過,佢係講中咗,老婆臨時叫咗成堆Friend去,已經註定實係大部份時間Shopping.唔講唔知,原來血拚係Shopping既諧音.上次坐完通宵機已經話咗唔想咁辛苦,晏去早翻他條啲好,竟然又係通宵機,仲要六點幾機走,跑到氣該追尾班車 @@


為咗要底到盡,我地係唔會坐呢隻咁快既車既,不過佢真係好型所以要影低佢.之後仲買咗3日任搭地鐡既pass,只需1500日元.除咗底之外,又唔駛買票,亂搭一通都得,JR去到既地方地鐡都去到,但多數要轉車,下載apps會教埋你點搭,原本諗住買既西瓜咭都冇買喇.


老婆話唔好次次住新宿,今次住上野.搭通宵機真係好眼瞓,攞房之後個個都話要瞓陣,雖然係好攰,好攰,我都決定襯呢個空檔搭咗兩個站去淺草影夜景,雷門對面既淺草文化中心可以居高臨下,最主要係唔駛錢,不過最擔心既事發生咗..........唔準用腳架,唯有開大光圈用高iso硬拚.仲見世光到爆,又冇得影兩張,純粹靠拉curve出翻啲屋仔.即使係全片幅都好多noise.

仲可以影到天空樹哦,在低位用廣角鏡低炒真係嘥咗,影建築物越遠影越自然.可惜呢個方向啲玻璃好高下,唔可以水平角度影.話時話Sony講到個五軸防震點勁點勁,用落好似同舊機差唔多.仲要係計APC-C既安全快門先掂,大既係像素太高既關係.


瞓足之後就係買買買,連飯都唔多願食.可能買到有啲唔好意思.居然話去睇皇宮,呢個係佢地平時唔會安排既節目.其實我都麻麻,又唔好意思say no......結果就中伏喇,見有人排隊參觀導賞團我地又排,諗住睇一陣就走,點知係唔得架.會被視為不禮貌,不單只要聽晒個悶到瞓差既簡介.每一個點都要講餐死,而最奇怪既係........原來只係外圍睇睇,係冇得入皇官裏面架,無端端冇咗幾粒鐘 @@


中伏後死心不息要去千鳥淵睇櫻花,網上話剛開花冇太大期望,實情係........一朵都冇呀.慘呀,見到路牌附近係靖國神社.一於去放炸彈出翻啖氣.啍,零式戰機,一於打雀咁打你 :P


見有好多日本人着和服四處走,企圖影吓,不過佢地眼光唔多友善,所以唔多敢影.影吓門口呢舊嘢就算.


終於班女人要去淺草買得意嘢.好喇,我可以影翻夜晚影唔到既人力車伕拉車,人力車pan鏡應該唔錯.點知.........落雨.論盡之餘仲好涷,得3度,又大風,都係喱翻上文化中心算數,沒有最衰,只有更衰,落雨關係連展望台都關埋,只好用長鏡離遠影吓個雨景,成條仲見世都係遮.


諗住去影雷門正面都係唔去喇.咁大雨,文化中心二樓遠小小都可以影到個大燈籠.


冇來東京咁耐,發覺多咗好多人,以往去六歌仙食飯都係叫我地9點45分先好來,依家已經變到係11點45分,築地啲人龍令大家既標準都降到好低,唔駛點排,邊間都冇所謂.決定要搵啲冷門啲既地方去透吓氣.由於有Pass,亂去一通之下去咗巢鴨,呢度真係老人區,賣埋啲嘢都頗out,不過購物狂居然又啱喎.見到有個佛又影吓佢.


我已經心中有數,與其就得咁辛苦,不如你有你買,我有我去影相.之後一齊食飯.咁就大家Happy啦,用620日元去世貿中心觀景台可以影到東京鐡塔.雖然天空樹比佢新,但係我喜歡佢在夜晚偏紅的色溫.落雨的關係,能見度比較低,但就反射咗東京鐡塔既燈光,天空都染到一片橙紅.可惜明天就要走喇,否則咁各有各玩都幾好.

2017年4月2日 星期日

巧固球攝影

真係乜古怪運動都有,呢個聽都未聽過,只係有日搭港鐡見到有個海報.咁特別,梗係要去睇吓 :P


在屋苑室內籃球場比賽,未去都知道光線一定好惡劣,啱晒可以試吓A99II既高感光度.呢種球既大概玩法係掟波去底線既網度反彈出來,另一隊接到為之得分,接唔到就掟嗰隊得分.為咗增加成功率.用支85mm全開F1.4光圈再用ISO 3200.快門升到1/640s.幾乎中焦就有相(雖然都唔易),快門慢啲既話就真係要啱啱跳到最高影先sharp到.


除咗暗,用光管照明係好弊.用乜白平衡都死,有時啱色,有時綠色,有時紅色,有時一半紅,一半綠,相機有防閃爍功能,不過好似好多限制,冇乜點試,影咗至算.


影影吓覺得85mm影出來都係太細粒,我想個人跳得冇咁高既時候影得大啲.轉用135mm又爆晒框.籃球場又冇觀眾席,我已經貼實鐡欄.好在鐡欄後面係走廊鐡欄又唔係咁密,終於我走咗去鐡欄後面影就啱距離喇.問題來喇,135mm光圈得F1.8,為咗保持快門速度,ISO提升到5000.原相雜訊實在超勁,縮圖勉強OK.


越來越多人,鐡欄前面已經塞滿人,周圍望吓,原來場另一面係有條樓梯,可以行高同行出小小,出口仲封咗唔會阻住人,即刻轉場.呢邊係自由咗,但背景係暗色.燈光亦都真係暗咗小小,同樣設定得翻1/500s.都依然係OK既.


居高臨下既關係,可以順便影埋場中接波既畫面.但焦距就差啲,要裁小小.


跳起畫面已經影到夠,索性走到底線影人接波,好處除咗可以水平角度影之外,背景比較光,有充滿光線的感覺.正諗住走竟然有人走埋來問我地啲相邊度有得睇,哎呀,好彩A99II既感光度頂得吓啫,用A77影的話分分鐘冇相交 :P