2017年12月16日 星期六

東涌大草地

最近屋企既鳳園好似越來越冇嘢影,好多人改咗去東涌大草地,呢度我都去過,似乎點都會有啲嘢影到,又去下.


一到步有啲不詳預感,有工程開始更換草地外的圍欄,之前既入口冇咗,幸好仲搵到另外一個入口,天陰陰,但都有啲細小灰蝶,翻屋企發覺原來影咗好多都係同一品種 @@


冇嘢影common弄都殺啦.去食飯喇,下午冇嘢影就算數走人.


下午運氣好小小,見翻啲其他蝶,呢種黃蝶好小咁靜,就咁影完仲有人用電筒玩背光,不過我都係鐘意自然啲.


呢個都唔知係乜蝶喇,總之肯停就係好蝶,一時大意遮咗個肚添.


忽然大家瘋狂去影一隻眼蝶,仲話咁既普通嘢都搞到咁可以想像到幾冇嘢影,我望一望好似去南嶺影過嗰隻,睇真啲原來唔係喎,係多啲眼的,佢身處環境都幾雜,結果張張相都有啲草直插蝶身,好在我仲夠道行事後清咗佢.
最近聽到壞消息話草地既草已經被剷晒,恐怕又會變成另一地產項目.

2017年12月11日 星期一

平山夜景

想去影相但又冇乜時間,近近地就去咗呢個市區山頭,大啲似嘉頓山,其實景觀唔係太開揚,大大座大厦就頂住面前,勝在唔駛行餐死啦.


咁冷門既地方居然都有同道中心,所以易去其實係一個好重要因素,上到山頂景觀都係麻麻,於是就喺樓梯等影夜景就算喇,算做OK但冇乜驚喜.


Zoom遠小小影埋獅子山方向.


帶咗135mm來,唔理咁多用吓佢,喺樓中間影出去依然都係好多樓,香港真係好迫.

2017年12月5日 星期二

影舞龍

曾經在報紙上見過一張搖拍舞火龍既相真係影得好靚,Pan得極準,又夠光.同平時見慣嗰啲一味慢快門到走火入魔,完全矇查查既相好唔同.同影單車繞圈賽唔同,呢個圈唔中下一個圈可以再試過,而舞火龍有機會成晚只橫向經過你面前一次,甚至一次都冇就收工,難度十倍都唔止.見到呢個室內舞龍賽就燃起我一試既衝動.


如果條龍舞得快,其實要將佢定格都唔易架,淨係搵對焦點對啱個龍頭可能都搞餐死,而且快門都未必夠快,不過其實套路中有好多慢動作,但求定格既話應該都可以影到好多相.所以要向難度挑戰,我全程用1/50秒快門影.但求模仿到嗰張火龍相.幸運地,套路中有一個連還左去右,右去左既動作,簡直係為搖拍而設,我都影咗唔小


由於條龍會橫向行一次,轉彎向前小小又行一次,一共三次先會轉花式,所以一共有三次機會,由於我用定焦鏡,所以會有三個唔大小既影像.條龍越近就越大頭.


之後一個動作就係狂Fing條龍,我仲未有咁叻可以跟到個龍頭,改為盡量影sharp舞龍頭嗰個人.


下午有青年組,應該多啲花款呱?襯佢地練習時又影吓.


青年組動作果然係快啲,同一快門速度更加有效果,有人以為動作慢先易影,其實係反轉,動作慢就會更慢快門先有效果,就更加易矇.


套路動作來來去去都係差唔多,不過青年組多咗一個瞓地彎腰起身既動作,彎起身嗰吓會停一停,係拍攝好時機,但龍頭位置塞滿人埋唔到去,只好影後啦.

2017年11月30日 星期四

大水管影火車

呢個地方好多人來影model.由於唔遠,好奇來睇吓,資料竟然叫人搭51K小巴,開住GPS架車點都係外圍走來走去.卒之搞到河上鄉行過去行餐死.唔怪得人,鬼叫自己冇小心求證.


鬼影都冇隻,爬上水管高小小影吓個景先,似乎冇乜特別,日落方向又垂直啲水管,冇乜睇頭,紀錄吓就算.


其實我目的係來呢度pan鏡影港鐡.弊,焦距太長幾乎爆框,用wide鏡又細粒得滯,兩頭唔到岸添.


搞咗一輪影到厭,一於行去上水方向睇吓有冇地方搭車走,唔想再行翻去河上鄉喇.原來呢度既水管遠小小,架車可以影到冇咁爆.仲影到尖頭車添.


咦,近路軌有啲梯可以爬上去再高位影,仲可以影正面來既車.啱啱爬到上去就聽到有人叫,攝影師先生,唔該你落翻來,我地整緊嘢掘到周圍都係窿,陣間你有乜意外我地擔當唔起,冇計,只好落翻來,反正有長鏡,就從遠處影架車連埋個彎位,仲靚過正面影啦.


影完左面來既車影埋右面,汁都撈埋都冇乜好搞,原來背面影日落都可以喎,不過冇乜平位放腳架,再來的話帶石膏手先得.

2017年11月25日 星期六

遲來的水運會

近日咁涷如果舉行水運會實變雪條,呢輯相實際係之前影的.曬到變炭.


一開始就先來水花四濺既自由泳.


首輪全部都係自由式,影到悶走去影起跳.出猛太陽應該點都影到啲半空相呱?哎……..不過參賽者都係初階多,平常跳水係會先斜向跳高,再拋物線向下,咁樣物理上先會跳得遠,但今日嗰啲應該全部都係45度跳入水,完全冇中間在空中靜止嗰吓,快門去到1/2000秒都係唔sharp.冇計,只好影吓入水既水花,規則好騎呢,如果唔識跳水既可以揀唔跳,啱晒可以用來做主體.


當然有背泳啦,啲水花真係唔錯.


蛙式最啱影正面大頭.


蝶式都係影正面啦,不過唔係好多賽手真係可以雙手出到水,有唔小都係刮水式,好在都執到幾張.


四式都影晒但仲有好多雜項,韻律泳真係認真麻麻,硬係喺水度唔知搞乜,唔多掂.


之後有水中操,呀…其實只係在到地既泳池度郁手郁腳,唔駛識游水都可以玩,認真老幼咸宜,連司儀都咁講 XD


仲有鬥快推水泡.


同埋水中救人鬥快,真係節目豐富.


來到壓軸既接力賽,原本應該可以打爆卡,一來天色已暗,快門開始變慢,二來向下45度跳水始終冇變,結果都係影唔到淩空的人.

2017年11月19日 星期日

火紅五鼓嶺

去影汲水門大橋時忽略咗另一面,即係收費廣場都有好靚既車軌,又係日落方向,在唔想太勞累要上山既日子就來多一次.


今天有小小薄雲,應該都唔會清水疍呱?終於到日落時間個天真係幾紅,唔駛特別整色整水.


太陽落山後個天越來越紅,光差冇咁大可以影個車軌加紅天,都算係意外收獲,可惜雲既形狀唔係咁靚,有小小平淡.


最後就係主菜青嶼幹線收費廣場既車軌,計過數135mm應該啱啱好,點知太啱,搞到啲山冇咗小小,再有機會來應該用85mm加1.4比較好.

2017年11月15日 星期三

誤中副用

有時見到啲大景,很想影埋自己入去,其實我唔係想影到此一遊,係想借人既比例增加吓個景既廣濶,所以用自拍棍影到個人巨人咁唔啱口味,反而係想影到個人好細粒,即使有腳架用10秒自拍其實都唔跑得幾遠.


搵咗一輪資料搵到呢個計時快門線,佢事實上係設計來俾人影縮時影片的.可以輸入第一張按快門之後幾耐影,隔幾耐影一張,總共影幾多張.第一個功能就解決咗10秒走得唔夠遠既問題,不過佢有個缺點係要入電,而且.......居然係冇off掣的.搞到成日要用先入電,唔用又要攞翻出來頗麻煩(其實都唔算太麻煩,不過因為懶,同埋次次影風景都掛住影景,搞到冇乜點用佢).
前排公司要我為活動影大合照,我又記翻起平時影合照既一個問題,首先絶對係唔可以假手於人,就算當佢人肉腳架,設定10秒延遲,我都試過係裁走咗小小腳的,所以幾麻煩我都會帶腳架.另一個問題來喇,咁多人既相實要影多幾張防止有人合眼,表情怪等.原來人係好心急既,影完一張先走去部機度按快門又等10秒竟然有人唔耐煩,要求其搵個人狂影,結果就係得第一張用得.有咗呢舊嘢之後我就可以叫佢連續影5張,唔駛等我走埋去搞,估唔到竟然主要用途變咗係咁.

2017年11月9日 星期四

偷偷摸摸影碼頭

網上見人地影葵涌碼頭好靚,但又唔知喺邊度影,同朋友去搵過都係冇頭緒,終於朋友再問人先知道原來要入去政府屋村先影到.仲話試過俾管理員發現趕走冇得影,哎呀,咁真係好搏喎.不過市區唔係太遠就搏一搏啦.


為咗掩人耳目,我地三人分開潛入,相機袋不能用,只用普通背包入住一機一鏡及腳架,好彩支腳架夠細,跟據線報,11樓看更好惡,不能去,最後揀咗10樓,等待時間真係好難頂.雖然已經喱埋樓梯一二角,但聽見走廊有人聲都會變得緊張.只係影相啫,又唔係做甚麼犯法勾當,估唔到要搞成咁.終於等到入黑喇.事實上碼頭既光都幾雜亂,變咗一塊,冇乜層次,不過總自還咗個心願.


仲有時間,影多一個角度,呢邊反而有啲光暗,層次,不過始終唔係大景,有啲似喺龍翔道觀景台影普通夜景.終於搞掂,走唔駛咁偷偷摸摸喇,去樓下睇睇,原來我地上次搵路都搵到呢度樓下個平台架,真係只差一線. 

2017年11月4日 星期六

得個亂字

一年一度Halloween,上年開始我已經放棄咗去影,實在太迫人,影車展大家用相機都好啲,知道距離太近影出來唔靚會保持合理距離(雖然都一定係有人好埋).Halloween用電話影多,志在呃吓like,距離去到黐住隻鬼咁滯.影出來變晒形,亂過亂世佳人,根本不能稱得上是攝影作品.但係原來好多人係有興趣的,上年啲人問我點解冇影,今年又有人約,咁就去啦.


6點來到已經勁多人,前兩年呢個鐘數都仲係好小人,可以慢慢搵位影,勁多人要同啲鬼合照.想影淨係鬼都頗高難度,幸運地啱啱啲人走咗我可以影到一張.


最鐘意碰到單拖既孤魂野鬼.


呢個鬼仔好nice,點影都就晒我地,原來……佢係做生意架.今年有好多個體戶幫人化妝,問吓價啦,200蚊,15分鐘就搞掂.仲猛話男仔都可以化,哎呀,真係咪搞我,容乜易整完之後變咗俾人圍住影.


嘩,群鬼出動,不過係小鬼,一啲都唔恐佈,好難先去得到正面,去到佢地又開始散,只能這樣了.


啲人好鐘意扮驚鬼個樣,呢個比較怪,唔知想點,不過又幾得意.


真正既群鬼出行.多咗個完全唔驚既人人搞到有啲怪.呢個時候要走喇,事關聽日係要翻工.


離開咗籣桂坊,估唔到付近街道都有得執幾張,相撲鬼都好,呢度仲冇咁迫添,睇翻當晚影既相,大部份焦距都係18mm,即係最wide.不過係APS-C模式,用24-70mm既話,光圈得F2.8,要用到ISO 2500,比較過如果壓翻同樣像素都仲係F1.8用APS-C模式會好小小,而我支18-35mm買咗全片幅之後都冇乜用過,等佢唔駛封塵都好.有諗過買支35mm F1.4.不過呢啲畫面都冇乜美感,得個亂字,都係求其算喇.

2017年10月31日 星期二

高炒迪士尼放烟花

之前上花瓶頂發覺青馬橋反方向原來係迪士尼,遠就遠啲,不過搵支長鏡影佢放烟花可能都幾特別.於是……帶咗支200-500mm上山玩,影風景用到咁長係好小有,印象中只有由三門仔影慈山寺,蝴蝶山影深圳試過.為咗輕啲,冇帶其他鏡影青馬橋喇.坐車時經過時先知道,原來青馬橋早咗開燈,唔一定要等到夏天先影.


由於8點鐘先放烟花,我特登遲小小先去,天黑落山就試得多,天黑上山都係第一次,不過….都係早得滯.7點離放烟花仲有一個鐘,其實我係預咗有路再行前啲希望用短小小焦距.行前咗都係要用盡500mm,原本可以再前,不過啲路好似唔多明顯,又黑媽媽都係咪搞.等我影定個藍色睡公主城堡先,陣間放烟花分分鐘會熄燈.淨係得烟花冇啲景配吓會好齋.


等呀等,死火,好大風好涷,雖然着咗風褸,都唔係好頂得順,侷住喺山頂做運動,打功夫,唔敢跑因為黑媽媽驚仆死.終於捱到8點,噓,真係熄晒燈,哎呀,搞錯咗,藍色嗰座原來唔係睡公主城堡,中間嗰座先係,好多有顏色既球狀烟花都係去晒右邊,不過唔改得構圖,否則就變咗呢隻淨係得烟花,其他部份黑媽媽既畫面.做乜鬼淨係放埋啲咁光既烟花架,收到F11光圈都好爆,影咗幾張之後卒之都試吓改構圖,唔係好掂,真係淨係得烟花乜都冇.斷估法最後得一張相.


影完係未得既,仲要用電腦合成.但過程非常簡單,唔需要用筆刷擦餐死又或者搞退地咁麻煩,只要合成圖層,揀變亮就得,呢招係我最近睇網上教學學既,所以真係學無止境,最後啲烟花好似升得唔夠高,再裁大小小先冇咁空虛.

2017年10月26日 星期四

火燒渣甸山

哈哈,係指火燒雲啫,這是十分難碰見的天文現象,坦白講,去影日落而太陽冇俾雲遮住機會都只係一半一半,一啲雲都冇又話清水疍,要咁啱啲雲喺太陽上面先有機會火燒雲,唔係話好似日環食咁一生人可能只睇到一次,記憶中一年都會有十次八次,不過多數唔係翻緊工就係唔做緊乜,總之唔係影緊相,最慘一次係我真係影緊相,不過係影緊長洲東灣,手上只有一支85mm鏡@@


天文台話就打風,咁又去唔太難行既渣甸山試試,最多唔得就補翻個夜景,上次來大霧到空手而回,日落算唔錯喎,冇俾雲遮住,不過地勢關係,前景係一啲斜射光都冇,只靠軟件夾硬拉回來,實際並不是影日落理想的位置.


今次雲在上面,叫糊,呢個位上次來包場,今日有碰見有兩個人,嗰度好窄,我諗四個人已經好迫,現在三個人算啱啱好.天上雲霞久久沒有散去,我以前見人地影到夜景加火燒雲以為係日夜各影一張夾埋,事實上原來係唔駛.呢張係一次曝光就影到.不過天空我係加咗啲味精.


一場來到,自然係補埋個夜景,個景其實都唔錯,最緊要係唔駛行得太辛苦嘛.

2017年10月21日 星期六

新地方

影蝴蝶來來去去幾個地方,但今次短時間內去咗兩個未去過既.


在一個天氣不甚穏定的日子,穿過朗屏村到達一個露天停車場,穿過後竟然有一大片草地,原來仲可以有路行上丫髻山,時晴時雨真係冇乜蝴蝶喎,蟲都殺啦,蟲有個好處係冇咁易飛走,仲係交尾,磨爛蓆慢慢影都得.難度係要景深包晒兩隻,咁啱有陽光可以收光圈,唔駛出飛燈.


但其實係落雨多過有太陽,所以大家都圍埋一齊避雨多,諗住落雨冇乜人會來啦,結果係越多越多人冒雨上來,最後應該有超過20人喺度避雨,雨一停又出去碰碰運氣,呢種小灰蝶都幾多,冇大隻既就影吓佢囉.


嘩,有蝴蝶交尾,儘管位唔係好好(黑底),都一樣排晒大隊,我都排咗轉,後來撞到有人話原來下面都有,個位仲靚好多,唔駛排隊………住,咁樣講一講,終於又係排大隊啦.結果影到甩尾大家先肯收手@@.


跟住係第二個地方,丫髻山山腳,平時一嘢就上咗山頂,原來未上山前行前啲又係一大片草原,一樣又係咁多人啦.今次Hea啲,冇帶腳架閃燈,次次都咁多人實在都幾難搞咁大龍鳳.出現啲咁既嘢自然又係排晒隊,今次用A99II既APS-C模式影,睇得出跟A700既分別嗎?老實講真係差唔多,不過高ISO好小小.


地方就大喇,不過冇乜嘢影,出口有隻小蝶一路飲水唔走.背景冇乜,一於玩爆框,影到咁大不得不靠晒閃光燈,我只帶咗一支燈,畫面上半部既背景黑黑地,事後搞搞佢都算OK喎,全片幅有呢樣好,推光暗位冇咁多noise,A700肯定點都覺眼啲.