2016年9月26日 星期一

追續相思

朋友介紹了有相思出沒的秘位,即使影雀係我弱項,都去試吓.地方公開都冇用,因為私人地方,唔係人人都入得去.


位置對住一大堆紅色生果,既吸引雀鳥,對增加畫面色彩也有幫助,實在是好位,不過…..鐡欄太密,支鐘伸唔到出去,侷住打直影,一打斜就會遮住鏡頭,朋友真細心,攞埋張圓凳俾我企過,鏡頭可以伸出去,斜都影到.有啲生果已開始枯委,唔係咁紅,先來影吓大隻啲比較容易影既先.


相思實際上係非常難影的,非常細隻,除非飛到好近,否則影出來一粒米咁.基本上唔裁相既我都侷住要裁.天氣原本都不錯.但偏偏影既時候又有雲.相思個頭又好鐘意搖來搖去,快門不能太慢.最後又係iso 1600,加上裁一裁,真係雜訊大爆發,散景也差了一大截 @@


今次仲細,但我反而比較喜歡呢張,一來相思有動作,二來佢企既位背景冇咁花.信不信由你,今次啲相全部都係手動對焦.我部古董機對焦準繩度真係麻麻,加埋支細光圈長鏡,環境一亂小小就成日對咗唔知去邊.手動反而仲有把握.


都係大隻既易影得多,而且唔係好郁.呢次冇頭先白底咁核突.啲花又幾靚,就算差唔多都影多張.

2016年9月21日 星期三

海洋公園哈囉喂

公司連續兩年都請去迪士尼,但上年已有人反映所有花車,節目都係一模一樣,冇新鮮感.所以今年改為請去海洋公園.之但係,居然揀正我生日嗰日請,係咪玩嘢,生日係唔駛錢嗰喎.都好,生日唔包玩夜場,仲請埋老婆算係咁.


我地其實唔太大興趣玩機動遊戲.又怕曬,所以真係黃昏先去.一去到就坐老婆最鐘意既吊車,晚上的吊車頗難拍.唔夠光,用盡F1.4光圈,ISO 1600都係得1/80秒快門,幸好吊車不是郁得太快.


山上其實同朝早唔係好大分別,機動遊戲照開,多咗啲鬼屋之類.路邊耐唔耐有人扮鬼出來嚇人,行咗一陣見冇乜特別又坐多次吊車落山.山下比較多鬼同人影相.我又影吓佢地,俾佢激死,同人合照就表情十足,單獨照竟然只係就咁企喺度...


呢個扮假人等人埋去就嚇人,不過啱晒我,夜晚快門慢稍有動作就矇,佢唔郁就正.


超大機械南瓜人原本坐喺度的,耐唔耐會怪叫同企起身,唔知係假既都幾嚇人,現在只覺得幾得意.


化粧幾特別,但一啲都唔恐佈囉.之後知道原來近排好多人都來咗.睇佢地啲相其實朝早同夜晚分別不大,一樣係四圍有鬼,分別只係夜晚氣氛好啲咁啦.

2016年9月16日 星期五

闖邊境

一直想近距離影吓羅湖關口夜景.現在沙嶺開放了,一於去闖闖.上水站搭73K就去到.睇地圖有兩條路,一條直達羅湖站,一條就去到山上警崗.呵呵,由香港行去羅湖站喎,要試吓,去到路盡頭真係見到對面就係車站月台,近到可以打招呼.不過……死火,有個牌寫住要經批淮既人或者車先入得,車要開閘一定入唔到.人既話…平時我一定唔理嗰個牌照入,但係有個管理員喺度.不過我又見好多人騎單車係咁出出入入喎…最後都係餚底唔敢入,冇得影.只好行一個巴士站去下個入口.


這個入口都好直接,沙嶺路行到盡就係,全程水泥路,十零分鐘冇難度,中途仲會經過龍友景點大水管.目標係對正羅湖站既景.不過橫掂來到轉角度求其影多張.呢邊黑得快過羅站嗰邊小小,可以影咗佢先.


目標位其實個景都麻麻,羅湖商業城實在沒有很特別.反而前面有個環型水氹幾得意.如果天空有啲雲彩倒影在水氹應該會幾有趣味,可惜當日死白一片.點搞都冇用,索性等夜晚算數.呢度啲蚊真係好飢餓,而且專虰頭,結果面部,額頭同後頸都中招,睇怕最好差唔多時間先入來影,影完即走,又或者着連面都包到實既防曬娃娃先掂.

2016年9月13日 星期二

除草

掘金的續篇………話說去影金斑蛺超多人,跟本冇辦法走位去構圖,只好見乜影乜,其實我都唔止影咗一張佢既相既,但有張俾葉遮咗肚,有張背景黑.揀得落手既就得一張@@


原相真的叫人嘔血,一支大草直插,已經俾人話冇構圖,再犯埋呢啲咁既低級錯誤真係冇面目見江東父老.燒炭死咗佢算數,好彩條草同背景分離度還算不錯,唔識都要試吓搞搞佢.


可惜冇Photoshop,聽講可以求其圈條草出來再按Del,內容認知就幫你搞掂.咁唯有回歸原始方法,一筆筆油走佢.網上教學話可以用印章工具複製背景再印去棵草度就搞掂,頭幾吓好似幾OK,搞搞吓棵草竟然出現在其他空位.大概係複製背景時複埋佢,咁又複製第二個位啦.越搞越鬼五馬六.老人家接受唔到新科技.只好再退一步,用最原始方法,就係用吸管吸隻旁邊既色,然後用筆刷直接油走條草.以為最難搞既蝴蝶翼邊緣出奇地順利.個智慧邊緣今次出奇地準,冇起邊.幾秒鐘就搞掂.之後出面既散景部份就容易得多,求其開個大筆刷求其油油就搞掂.似乎我都有小小藝術細胞喎,.
 


2016年9月7日 星期三

丫山掘金

話說丫髻山出現金斑蛺蝶(罕有),於是又搞到人山人海去影,我也去襯一下熱鬧.可惜……….原來隻蝶係有最高工時的,通常只會在早上9至11出現,跟住就會消失,我就係過咗時先去,所以就影唔到喇.


咁都唔一定要影到目標蝶既,其他蝶都有佢既美.例如裴豹蛺蝶顏色同花紋都好靚,我係有影過,仲係交尾,不過嗰張因為落雨趕住走既關係,太急影得矇矇地.正好襯呢個機會補翻.構圖有花固然最好,冇既話草堆都唔錯,錄底顏色看上去都幾舒服.仲有其他蝶,不過唔知點解好多都係爛既,費事大家要洗眼所以唔貼喇.


影唔到目標唔心息,有勤力既人(佢已經影咗,想影靚啲)再約,於是又去多轉,翻工咁早起身,去元朗要成粒幾鐘,上到山要兩粒鐘.一上去已經見到目標,仲係兩隻,不過正因為咁,佢地打來打去硬係唔停,咁窒一窒就弊,越來越多人上來,最後應該成三十人,追逐兩隻蝶來影,跟本寸步難移.只好祈求隻蝶停在自已前面,啱距離,啱角度先有得影.等咗好耐終於有一個機會,構圖冇乜喇,有乜影乜.


金斑蛺影咗就算,成堆人真係好難迫埋去,影吓第二啲.其實橫睇掂睇,金斑蛺實際上唔係靚得咁交關,不過物以罕為貴,咁都可以理解既.翻到屋企搜尋吓金斑蛺蝶既相,個咀應該係尖喎,因為我都記得蛺蝶科個咀係尖的,但啲紋又真係一樣,最大可能係個咀已經磨到爛咗,噢…….千辛萬苦影翻來既竟然係爛蝶哦 :(

2016年9月1日 星期四

雨天的玩意

約咗朋友去影蝴蝶,可惜天氣不似預期,出門口前落雨,約咗人失約好衰,咁就照去啦,或者陣間好天呢?上咗車冇耐就收到訊息….不過唔係取消,係晏啲先出去,咁我去先啦.


去到都仲係落雨,而且頗密吓,正想搵個地方避吓雨,嘩,身後冇幾遠有架車經過水氹濺起巨大水花.係喎,我咪成日都話要落雨去pan車既,今次仲唔大好機會.弊在……我得支180mm微距,條路咁窄冇得退pan一個車轆就得.唔緊要,離遠影水花都唔錯.揀啲大架啲應該勁啲,水花比我想像中細喎.不過都好興奮 :P


影咗一陣個位好似唔多靚,行去另一面先得.呵呵,有雙層巴士,今次仲唔好似U571掟深水炸彈咁勁,不過………原來除咗車大,仲要夠快水花先勁的,個司機有冇搞錯,咁斯文慢慢過,搞到一啲可觀性都冇.要我單手擔遮,相機袋放在濕漉漉既地上,竟然過得咁hea,我接受唔到呀.


嗱,咁先係嘛,有啲洗車感覺,但係我發覺啲水花似乎係旁邊架的士做成多啲,可能捉錯用神,大車多數搵食車,安全第一,唔想因為玩而出意外呱?


又試吓影細車,啲司機果然係比較頑皮,好多都唔收油,係咁剷過去.見到佢真係好似跣到側側地,哎呀,都係唔好走咁埋好啲 :P


哈,直情好似衝出瀑布咁.可能見旁邊有車過,大家鬥片.洗轆之餘順便幫對方洗埋車 :P. 雨下個不停,正正可以幫水氹補充.否則應該玩幾吓就冇晒水,應該都唔會好天架喇,決定走人,差唔多翻到屋企…….竟然出太陽,再沒有比這個更差 @@