2016年2月27日 星期六

又C3動漫

香港動漫真係多人到PK.已經唔想再去,如果唔係諗住影舞台Cosplay大賽,C3係會小人好多.預先買定飛,幾乎一去到就有得入.而且票量好夠,我去到灣仔仲見OK攞住大疊出來賣.


一入門口就有高達同你打招呼,背景就係亂啲冇計,不過高達嘛,簡直係經典中既經典再加經典.我朋友居然同我講冇睇過喎.咁有兩個可能,一係你窮到連電視機都冇,第二個可能就係……….你跟本係女仔來  :P


睇翻現有幾多高達模型同埋有幾多抄佢既角色就知佢對日本動漫界有幾深遠影響,多數攤位擺figure都係一隻隻咁擺,場景係好小有的.


星戰又係經典,不過鬼佬嘢我覺得始終係粗支大葉,差日本仔一皮.佢呢個場景都幾靚既,有啲雲模仿飛緊,打燈就差啲喇,光爆一架戰機.


哈哈,哈利豬特(要睇過Samson電影先知我講乜),呢間玩具公司係以像真Figure出名,真係十足真人一樣,一絲不苟的.我見隻Figure啲鬍鬚好有層次,就決定搵佢做model.


呵呵,當然有一類Figure係唔能夠唔影的.其實我仲影咗好多,不過因為呎度問題,實在太離譜,實在唔可以貼出來,大家就幻想一下吧  :P


有幾個大咸疍超人,呢度打燈嗰個真係好差,下下都係一支超強燈照死一個就算.要影到中間嗰個爆晒側邊既先見到,雖然用閃光燈幫到啲,但係背景照唔到既地方搞到黑晒 @@


影咗咁多公仔要影吓真人,往年都係最邊嗰度留翻俾cosplayer,今年都係,但係就間細咗一半,迫到嘔,搞到啲cosplayer四散.幸好又有啲參展商有高達女郞俾人影.迫到迫都要迫埋去.


個個都鬥wide真係冇乜機會影全身,除非接受到變晒形,襯住冇乜人影張全身先.


其實先前個位都唔係咁好,人多背景花,暗,用光管光源搞到偏綠,行行吓我見到啲cosplayer去咗另一邊,有啲仲自己搭閃燈,我都去影埋一份,起碼背景冇咁花,睇到影緊乜.


雖然唔係淨色背景,都好過人頭湧湧咁恐佈.

2016年2月23日 星期二

嘉道理梅花

嘉道理農場最近在網頁出咗個開花指數,分別有鐘花櫻桃及梅花,真係好,唔係再撞撞吓或者周圍問人.諗住全部都100%就去翻轉(雖然肯定爆人).可惜……….世事冇咁理想,鐘花櫻桃去到60%之後就一路停滯不前,日前再去睇,竟然仲跌咗,有人講係因為早排山頂太涷結晒冰,雪死咗,好彩有啲梅花在山下避過一劫,見到有80%,襯仲有得睇去睇吓…….



星期日應該上山車好密架嘛,11點半去到,噢,最快有飛賣既班次係2點半,咁幾個鐘唔通數手指,決定就咁行上去就算,我記得山下都有一棵梅花的,橫掂唔駛趕車,去影吓佢先.影梅花最難就係要影到好多花但唔覺亂.上次用個天做背景,係就係唔會干擾,不過死白搞到好怪.今次盡量用遠山做背景,唔係好綠都算有啲改善.
 
 
然後就係最辛苦既上山喇,行車路既話係非常遠的,想快的話可以行一條叫做擎天徑,一出已經去到蝴蝶園,當然快既代價就係斜路同樓梯.話咁快就行完,放棄再上搵鐘花櫻桃,就咁跟車路行翻落山,竟然要行到猛禽餵養區(即係差唔多到山腳)先有梅花.早知就行車路啦(以為好醒,其實………).影梅花只影特寫既其中一原因就係一定要滿開先靚的,你睇,好似亂草咁,我認為最多可以叫60%,同上年嗰啲差好遠.
 
 
跟住來幅特寫,背景即刻乾淨晒,亦唔駛影到好似棵柴枝有一堆濕水厠紙咁 @@
 
 
跟住原來就冇架喇,認真搵笨,心有不甘,去翻山下嗰棵影多幾張特寫先,靚位真係冇乜,唔係背景太花就係正晒光,可能有人鐘意正光顏色夠出,快門夠快,但我係盡量避免的.除非有閃燈可以照光背景,否則正光影淺色花既必然後果就係背景變黑.搵咗好耐,終於另一邊小路旁有暗位,影完收工.



2016年2月18日 星期四

賀歲足球

朋友話有免費賀歲盃既飛,叫我去影吓相,咁正梗係去啦.


一共有三場比賽,頭場係女子80後對90後,點半就開始,我地到場已經點九,諗住趕快入場,點知朋友又話要排隊玩遊戲攞紀念品,跟住又要同足球女合照,搞搞吓入場搵埋位已經幾乎完場(得一場過45分鐘,不換邊),只影到幾張相.


下一場係香港名人隊對外援名人隊,其實係已退役名將,亦即係…………..老人隊.朋友話應該呢場擺最先,等佢地依家可以睇女子隊喎,仲好意思講添.雖然係老人隊,都幾賣力喎,我地在觀眾席最前一排,一到底線就好易被大會攝影擋到,這也是無可奈何的事情.

影唔夠十分鐘,我兩個朋友又唔咗人,原來佢地走咗落球場搵球星Selfie.我發覺佢地唔多似來影相,觀眾席影得好辛苦,坐喺度欄桿啱啱阻住,企起身又驚阻到後面,後來閃咗去坐位邊樓梯轉角位影.起碼企喺度都唔會阻到人,呢個位最啱影左手邊落底線.


班老人家都幾搏,跳到好高頂頭鎚.


好多高空波.

 
話咁快第二場又完,因為又係得45分鐘.呢個時候開始好多人入場等睇四點既香港聯隊對香港代表隊.我入場時對住底線兩邊係冇乜人坐的,因為曬到黐肺,但依家坐滿,今日係全場滿座.後生仔果然唔同,速度快好多.激氣,又被前面啲人阻住.
 
 
但係過冇耐已經慢翻晒,搓來搓去多,梗係,咁快體力會極速下降.
 
 
下降既並唔淨止體力,仲有我支鏡最重要既陽光,原本在底線既陰影越來越長,好快己經過半場,超越我支鏡既射程範圍,幸好亦差唔多完場.夾硬靠推高ISO總算頂到夠鐘.

2016年2月11日 星期四

迫死人初一花車

朋友問我新年有乜好影,例牌節目由初一開始就係初一花車巡遊,初二烟花,林村節,初三入馬場囉.最後佢最有興趣係花車,咁就預時間霸位啦,前年4點到都幾乎冇位,今次預3點,出奇地好多位,搞到唔知星光行門口定廣東道轉海防道位好,由於朋友只有一支135mm F2,最後決定海防道,可以影到花車正面………


目標位唔可以即刻霸的,因為要5點幾先封路,我地先在路邊位紮營,諗住一封路就沖出去………人算不如天算,今年竟然改咗擺隊樂隊喺嗰度,欄桿設在樂隊後面,即係遮晒,唯有留守原地,即係同前年差唔多位置.今年改咗好多,等到8點半真係好悶架.6點已經有表演隊伍出來巡一轉,等如早啲開始.


仲有小丑同大家玩,派吓禮物呀咁.原本成5點都仲有前面位,忽然間後面已經幾排人,如果想去厠所既話,恐怕冇辦法入得翻來.


呵呵,唔解釋 :P


星戰做型好多場合都會見到.啲光管都幾得意既.


比起就咁踩高蹺,我覺得呢個扮恐龍幾有創意喎,裏面仲有機關可以郁個龍頭去搞啲觀眾,搞到依嘩鬼叫.


終於等到花車出現,已經係8點半,打頭陣自然係主辦機構國泰,算係最冇創意,最官方式既表演隊,年年都係搵班空姐揮揮手就算,服裝錢都慳翻.


舞獅舞龍肯定一雞唔知幾多食,用完又用,都好,有加咗啲LED玩吓夜光.人越來越多,多到行人路都塞埋,要警察驅散最後排既人讓翻條路出來,我直情係冇得郁,好彩我已經預先袋定啲電,因為跟本冇辦法有位打開相機袋,不過要換鏡就唔駛旨意.


財神到都唔怕整豪啲,應該都可以用完又用.


其實好多花車都麻麻,十足四方盒咁,所以我好多都費事影,馬會都叫又小小唔同啦.


應該係非洲隊?我發覺啲觀眾都幾毛手毛腳,除咗睇之外,隊伍稍近小小就出手摸,唔怪之得美國啦啦隊唔係好敢行咁埋 :P


由一堆人用連桿控制個大公仔,呢招渣打藝趣都見過,唔知會唔會今年又用多次呢?


吹氣公仔幾時都最好用,小小料就可以做到好大件,所以年宵市場都好好賣,空氣加兩片膠就搞掂,小朋友歡歡喜喜又有大玩具.做成有名卡通人物自然無敵,有一樣嘢我真係好唔明,做乜個隊名牌要擺正中間架?唔止咁,播音樂用既喇叭,工作人員,全部都係喺遊行隊伍前面行既,竟究知唔知道呢啲嘢唔係透明架 @@

2016年2月6日 星期六

白茫茫青山灣

連續成個月落雨真係悶到發癲,竟然有一日星期六係好天,真係乜事都要借過等我出去玩咗先. 最近對有船,有海既景好有興趣,搵咗一輪決定上九逕山影翻過青山灣.


由於入口要經過麥理浩徑又在球場旁邊好易搵,但之後要在山邊分支上山就頗隠蔽,我見到條白繩都猶豫咗一陣,襯冇乜人睇到先鑽入去.條路都算崎嶇,尤其後段多數係碎石路.幾經辛苦終於登頂(其實差小小,因為最尾嗰小小實在太斜)…………明明朝早仲有太陽,下午陰晒不特止.煙霞仲大到………直出跟本乜都睇唔到@@


一場上到來點都影埋夜景先走啦,周邊都好多懸崖位,係咪有啲似自殺崖 :P


最高位影係靚啲,不過低小小既平位旁邊冇嘢阻,可以順便影埋都市景,而事實上頂位真係好斜吓,我驚陣間黑晒落來有危險.夜晚啲煙霞都冇乜點散,事後以我既功力執餐死都係咁上下.


順手影埋隔離,冇乜特別,跟住就係最艱辛既走人,除咗路斜之外,某啲路係唔多明顯,我都行錯幾次,幸好行錯路好快就知(啲草越來越高同埋冇咗路就要行翻轉頭),不過會幾驚吓,因為真係迷咗路好大鑊的,就算搵到人救都實俾人唱死.終於見到出口,放下心頭大石,去大快活嘆翻個晚餐先.

2016年2月2日 星期二

太古城天燈展

成個月都落雨,真係悶到發慌,點都好,搵啲室內嘢影吓.

影商場擺設最常見的問題係背景太花,好多商場都係買舊嘢翻來,求其有位就擺,好小理咁多.所以好多時都係影特寫就算,一用wide鏡就會亂晒籠.好彩今次都算擺得集中.而且會發光既燈比較容易突出到,用wide鏡都OK.


用埋魚眼都OK.如果啲燈疏小小,只係小小,用魚眼都會變得好稀疏的.


本來帶咗長鏡諗住影到啲燈比較貼,現在睇來作用又唔係好大添.


又行去第二個位睇吓,在商場消費唔知幾多錢就可以放一個電子天燈,整好後會在商場的電子屏幕播放,又幾有諗頭喎,玩得來唔駛咁多垃圾.我都襯呢個機會祝大家學業進步,科科滿分 :P


假要假得夠徹底,要完全見唔到商場景先為之合要求,商場冇錯係有塊大既假景模仿滿天天燈,不過就唔係好夠大,要小心就住否則好易穿崩.


話咁快就影完天燈集中既部份,其他地方啲燈都好疏落,影都無謂,但係天燈下溜冰都幾得意,好,影埋呢張先收工.