2016年12月29日 星期四

冷清鳳園

本來天氣咁涷我應該一早收咗爐唔影蝴蝶昆蟲.但個個都話有蚜灰出沒,橫掂又近,卒之又去一轉.


人黑冇藥醫,明明朝早都仲幾好陽光,下午竟然變咗天陰陰,一冇陽光啲蝴蝶喱埋晒,靜英英,正想走之際見到有飛鳳,呀......陰天又飛緊,好高難度喎,ISO 800,快門得1/100秒,唔理咁多,亂槍打鳥,最後都有張勉勉強強啦.實在太兵慌馬亂,影得太中間,一向唔喜歡裁相既我都要裁翻側佢.其實陰天都有陰天好,起碼影到朱古力眼,又唔駛驚光差太大影到黑媽媽.


諗住應該收爐但又有人話去,姑且再搏一次,黑開就黑,今次仲落埋雨.真係蝶毛都冇條,數數吓手指見到有蚜蟲,冇蚜灰,蚜蟲都殺啦.有腳架,又冇風諗住冇死,可以影2:1都得啦?但硬係好震,應該係支腳唔多夠力.諗住用引閃帶咗A700去,咁就出事,又唔記得帶快門繩,2秒延遲都係震,10秒仲衰,冇反光鏡預鎖.終於影咗好多先有一張勉強得.事後諗翻我做乜要擺腳架個波頭咁蠢,應該用腳架環轉角度嘛.而且我有兩支閃,點解唔好似夜攝咁影?一時腦閉塞 @@


落雨都有落雨既玩法,有人建議影水珠.我仲以為係就咁有棵花上面有啲水珠咁啦,原來係花後有花,要影到水滴裏面見到後面朵花.雖然離好近,但半圓既水珠就好似魚眼鏡咁超大視角.所以會影得晒成朵花,不過會有啲技術上既問題,就係唔夠景深.其中一個做法係特登影細啲然後裁翻大佢.我唔係幾鐘意裁相同記得雜誌講過可以影兩張夾埋,一張對焦水滴,一張對焦水滴裏面既花.Focus stacking既軟件我冇,只係用圖層方法.影既時候我已經察覺到其實改動對焦位置係會同時稍微郁咗個構圖.一扭對焦環放大率已經唔同咗,而花枝並不是在正中央,所以會移咗位.實際操作起來,成朵花見到既一定冇問題.上面嗰行黐住花枝既放大佢慢慢擦都可以.下邊又黐住花枝既係搞唔到.因為一擦得貼就會出現對焦後面既花枝,所以只可以用漸變擦小小,貼邊既地方冇得搞.不過影到咁大,嗰粒水珠都已經跌出景深,朵花清反而唔自然.就當佢本來係咁囉 :P

2016年12月24日 星期六

溜冰嘉年華

又一城一連三日舉辦聖誕溜冰嘉年華,由溜冰班學生及導師表演,又係影相好機會.
 

來過又一城影溜冰既人都會知道,呢度既燈光係超級恐佈的暗,肉眼望落去都已經係暗,基本上啲相係唔會好理想的,但聖誕節會有射燈呱?都係搏一搏,好彩搏到,射燈超光,有望影到啲快動作,小朋友動作慢自然冇問題.


原本企正面的距離比較遠,但估計溜冰班會玩多人,側面斜咗唔好睇.而且見大會攝影個位都係正面,所以都企埋一份,確實都有啲好處.三個人剛好塞滿畫面.


不過越影越唔妥當,唔知點解好多表演者都鐘意後排攻擊,變咗影得好細粒,導師的精彩表演搞到要裁相,其實有啲唔係好想要,不過動作又幾靚.


都係試吓走翻去側邊影先,寧可角度冇咁好.咁細個小朋友技術應該冇乜,唯有玩可愛,雖然係好大堆人,但一字排開要影晒都會好細粒,通常我都係影其中幾個就算.點知後尾竟然玩舞夜光龍,只係玩咗一陣,想換鏡都換唔切,爆晒框 @@


冰上芭蕾舞表演,原本應該好正,可惜好散,走到成個場都係,打燈既又打到亂晒籠,經常都係打落冇人既地方.淨係企定定既佢先搞得掂.不過呢個係好多習體班既通病,冇乜舖排,各自各學咗乜就搵個地方做咗佢.


呢隊其實都唔好得幾多,總算有啲集體花式,儘管係比較簡單的繞圈.計埋係在冰上做,對小朋友來說也是有點難度了.


夠膽單拖表演的技術都有翻咁上下,會有啲跳躍,高速轉圈等動作,坦白講,我未影過一次轉圈動作係理想的,一般室內光線根本冇足夠快門凍結動作.今次有射燈幫忙,快門達到不能相信的1/800秒 :P


歡樂既時光過得特別快,整個表演只歷時45分鐘左右,臨尾聖誕老人同聖誕小妹妹跟大家說聲聖誕快樂,新年進步,恭喜發財 :P

2016年12月19日 星期一

荃灣體育節舞蹈比賽

這種公開俾街坊參與的比賽水準肯定唔會太高,但通常對去影相既人比較冇乜所謂.朋友說想影吓其他活動,咁帶佢去應該就唔會出問題,你知啦,陣間話唔俾影會好唔好意思的.


睇賽程表已經知道上午全部係單人舞,而且仲係比較小年紀既,肯定悶到爆,決定下午先去,但依然有加插單人舞,單人舞係乜?就係一個假裝有partner,但其實同空氣跳舞,十分怪異的@@


幸好之後來了一場青年組標準舞決賽,連司儀也說是全日最精彩,但我看來也只是普普通通吧,算吧地區賽不能要求太高.原本橫邊比較近距離,但長邊對正佈景版,背景唔會全係觀眾,所以遠啲都要呢邊影.朋友去咗橫邊一陣都翻翻過來.


之後終於有雙人舞,不過.......係兩個女仔.跳舞界一向都係女仔多過男仔.這也是舞可奈何的辦法.呢個位真係唔錯,我比較小影全身相因為實在太花,這個背景實在難得,不過小朋友服裝就齋啲.


啲花式都真係冇乜變化,來來去去都係基本步.


唯有試吓影一群人增加小小變化.


影單車比賽要用慢快門係常識,不過原來都幾多人認為慢快門就係一切.咁又係既,一係唔影,一係就影到最靚.影運動就係要有動感嘛.不過….如果講完出唔到相咁都只係紙上談兵.會有咁既觀念其實多得好多攝影比賽,好多時冠軍都係慢快門,連主體都矇埋既作品.我就唔識欣賞喇.所以都冇人搵我做評判囉.

2016年12月13日 星期二

機場觀景台

其實係第二次來,上次已經係好多年前,當時係為咗近距離影升降既飛機,冇諗過影風景,連腳架都冇帶,今次反而想影吓風景,不過梗係早啲去影埋飛機啦.今次我要試吓pan飛機先得,呵呵.觀景台係要收錢的,分15蚊同40蚊兩種.40蚊係全日票,相信係可以隨意進出呱?15蚊只可進出一次,裏面係完全冇補給的,而最重要係………冇厠所.想磨爛蓆就要有大容量膀胱 :P




天氣唔錯呀,日落該有希望,不過……飛機就冇喇,全部去晒遠嗰邊起飛.大背光,又遠,又同地面冇互動.諗住專影飛機就死得.唯有等日落啦.今日啲雲彩幾靚.但最後一刻係滿天雲,好彩未落得好低之前已經影咗啲.地面光差非常大,影兩張夾埋都唔掂,終於影咗三張夾,一張最前面既機場大樓裏面同地面,一張屋頂同後面地面,一張天空先搞掂.


跟住等夜景,光差細過日落,易影好多.雖然等到個天藍晒會好啲,但屋頂會變到全黑,冇晒紋理,比較妥當都係早小小襯屋頂未黑晒影咗地景先,之後再夾個天上去.你見我呢張個天都唔係好藍,事實係衰貪心想襯個天未黑晒影多兩個景 :P


首先係呢排光管.個天已經幾勉強先谷得光.仲有光管跟四周街燈既色溫相同光差都極大,終於又影咗三張相.天空的色溫跟右邊街燈環境一樣,但就要影光啲.至於光管,影暗啲之餘仲要白平衡都唔同,否則會變晒藍色.


九秒九跑去最後一個景點,就係影車軌喇.乜都唔好理,先影咗個天先,下面慢慢搞都冇問題.應該都係最後機會喇.再遲的話個天點谷光都會係灰色,唔會係藍.車流都係好疏落,用翻上次在火車站的技倆,影咗15張相夾埋就有呢個車來車往既感覺喇.

2016年12月8日 星期四

小小小灰蝶

放假下午天陰陰又大煙霞提不起興趣影風景,之前聽人講元洲仔公園唔知有隻咩弄黃黃地色幾得意,橫掂咁近我,一於去望望.

呢個公園點睇都似係公公婆婆食完飯冇嘢做走來透涼既地方,唔似會有蝴蝶,行咗一個圈好似蝶毛都冇條,就連蟻都冇隻,正打算走嗰陣有隻豆豉咁大既灰蝶停落啲紅花度,應該係灰蝶呱?咁細隻.都好,唔駛食白果,弊,咁細隻又天陰,快門好慢,Iso又已經去到800.又唔想用淨係用閃搞到黑底.唉,上次帶腳架俾人鬧搞得耐,今次獨家又居然冇帶腳架.仲有第二招,就係搵個攝影背包借吓力.快門下降到1/40秒影咗幾張終於搞掂.再慢就真係搞唔掂,影極都係矇.


同嗰隻蝶玩咗好耐,想走之際,見到隔離盤草有啲嘢飛飛吓,原來有好多只有半粒豆豉咁大既蝶仔.呀,挑戰難度呀,差唔多影到1:1咁滯,自然光,仲要係陰天,手持自然光影1:1我都係第一次.白色蝶好處可以增加一點入光量,副作用就係黑底.麻麻地都叫做影咗.底又唔係好黑喎.諗住食白果結果有兩張收獲都算係咁囉.

2016年12月3日 星期六

又身痕

用開既Sony 50mm F1.8又平,又輕,畫質都算幾好.全開係差小小,縮到F2.8就超sharp,點都好過zoom鏡既F2.8.但人既欲望係無止境既.Sigma支50mm F1.4講到好正,F1.4就用得.想要好耐,但Sony又好似已經放棄咗A mount,仲買A mount鏡有啲掉錢落咸水海感覺.


點知突然話出A99 II,即係A mount起碼仲有幾年玩呱?又燃起咗我既擁有欲.走去問吓價啦,有冇搞錯,Sony版要貴一千蚊.間間都係咁,又猶豫咗一陣,一日見到有水貨同其他牌子同價,就立即扑鎚.老細仲問我你用Sony要加轉接環,係咪買埋,我好肯定答佢我係用A mount. Sony搞到人人都以為A mount已經摺埋咗.支鏡比想像中大支好多.E mount機真係會頭重尾輕.


來個合照比較吓,最細既肯定係Sony 50mm F1.8啦.最意外係支50mm F1.4竟然係大支過支85mm F1.4.大家一樣光圈,短焦距既竟然仲大支係第一次見.


接下來要睇睇表現,這個在酒店內的跳舞比賽,光線真係差到地獄一般,Iso 1600, F1.4既快門只有1/200秒,如果只有F1.8,就係1/125秒快門,幾乎到咗係冒險玩效果既地步.結果我全程都係全開F1.4影,Sigma黑科技真不頼,F1.4真係就用得.


夜晚影人都好正,縮到F1.6多小小景深,畫質絶對係放心.唔駛下下谷到咁高Iso.


朝早用更加冇問題啦.就算暗小小都可以用Iso 100影.咁支Sony 50mm F1.8係咪放咗佢?咁又唔係喎,因為支Sigma實在太大支,有時只係驚zoom鏡唔夠光帶個保險,未必會用,咁細支啲係好啲.


 

 

2016年11月29日 星期二

石澳太平清醮

十年先舉辦一次,唔睇就要等十年,不過………潛意思即係,唔夠人力物力年年搞咁解,規模唔慌大,想感受長洲嗰種氣氛恐怕就會失望喇.但我又咁諗,即係冇咁多人,影相會自由啲,唔駛好似長洲咁整日硬食一個位,連厠所都冇得去. 


巡遊前半個鐘去到,戲棚附近已經打鑼打鼓塞滿人,但巡遊路徑仲可以隨便企.終於等到開始,一龍雙獅出晒(其實係得咁多,龍仲要係細size嗰隻),低角度影唔係好靚,好彩退退吓見到有人爬咗上茶檔圍牆上高角度影而且仲有位,咁我又上埋一份,角度靚得多.真係people mountain people sea. 


輪到重中之重既飄色出場,聲稱除咗長洲就得呢度有,高角度影埋下面啲人同後面花牌似乎頗雜亂,但又好似幾熱鬧.後尾村民講其實啲工具同衫都係搵長洲租的,唔知真唔真.想打電話叫朋友上埋來影,結果係唔聽電話,到佢肯聽既時候已經出晒(總共只有五個飄色).


好彩,入一入村好快會出翻來,原位可以影多次唔同方向.哈哈,天氣熱食啖嘢先.巡遊隊伍跟住就會去大浪灣先翻轉頭,大會公佈時間係兩個半鐘.即係可以落場或者走人.

諗住可以翻轉頭影多轉逛吓會場,食餐飯應該差唔多.呢個大士陣間五點會出巡,明天仲會火化,不過唔睇喇.所有食嘢地方都係賣齋,見到有醬燒茄子啱晒,因為我唔想食嗰啲假肉.點知賣晒 @@


未夠鐘去影吓大戲.射燈夠晒光,演員動作又唔係好大,但......十分難影.啲人都唔係來睇戲既,不停行來行去.百分之九十既時間都係有人遮住,算數,求其影幾張,反正唔係好大興趣.

驚住個靚位俾人霸咗.兩個鐘左右就翻定去,結果兩個半鐘係影都冇,啲人話今年人多行得好慢…三個鐘……三個半鐘,就來變化石喇,好喇,終於出現,角度對正都唔錯,不過……居然行對面馬路,嗰堆車真係好礙眼.仲有更慘,原來係冇飄色架,等咁耐淨係得舞獅同舞龍仔,可能係天氣太熱啲小朋友頂唔順啦.


一場來到,去埋影大頭洲,上年來雖然係陰天我都覺得幾靚,今次有陽光色彩更加鮮艷 :)

2016年11月23日 星期三

單車繞圈賽

其實去消防局影蝶只係順便,去影單車繞圈賽先係主菜.公路單車賽由於只可以企一個位,除非好似渣打馬拉松咁大形,否則車群一過就影完.繞圈賽就唔同,每個圈都有一到兩次機會.


掛住影蝴蝶既關係,去到已經開咗賽,直路旁邊大把位,但彎位已經爆人.最後搵咗彎位出小小既直路.點解個個都揀彎位呢?首先直路既問題係比較難影到一大堆車.由於車既比例同相差唔多,除非啲車貼得好埋,否則架車影得大架既話就差唔多霸晒整個畫面.好似呢張咁,後面得翻半架.


咁影細架啲囉,冇錯係多咗車,但上下空位就會變得太多,所以會見到有啲相裁成長條形,不過咁又唔多啱我口味.


最正既位其實係大直路在一邊,車剛抽頭出彎位橫移既時候就可以影到頭車移動之餘,後面又有一大堆車喇,可惜最正位置已經冇晒位.我夾硬在對正大直路試咗幾張,一來構圖麻麻,二來架車啱啱出彎,冇乜速度,要好慢快門先有效果,以我既修為係搞唔掂.退而求其次,試吓影正面好多車衝過來既畫面,竟然焦距唔係好夠長,影得好細粒 @@


我企的位置都有一個好處就可以遠影埋對面路,變咗一個圈有兩次機會.背景綠啲也比較靚,不過最衰係車群出現既時間比較短,雖然遠處就望到車來緊,但路遮住影唔到,工作人員又企到鬼咁出,得翻一秒半秋搵車,有時搵得來已經走晒.哎呀………冇咗一忽.@@


影單車除咗影車海,幾乎一定係慢快門搖拍,高速快門會令到車到背景完全靜止,好似一架架車泊晒係度咁.而對焦住亦通常係落係帶頭既車度,至於用幾慢快門就好睇現場環境例如距離,焦距,車速等.可好多人為咗效果會走火入魔,用到1/15秒,1/10秒等極端快門.冇錯背景係好花好有動感呀,不過就連主體都矇埋,次次單車比賽之後Facebook實有大量呢啲矇查查既相.一張成張都矇既相我就唔明有乜價值喇.主體可以矇既話,用一秒都得啦,我寧願開腳架索性矇咗啲車手影景算喇.起碼個背景清囉.哈,終於有張比較多車既相.

2016年11月19日 星期六

消防局影蝶

多得一班影蝶朋友既帶領,先知道東涌消防局旁邊塊大草地有蝶影,否則我咁背既人一定唔識去.


諗住到咗消防局就咁行過去係唔得的,因為圍晒鐡線網,但俾啲耐性搵吓就會見到鐡線網有個缺口剪開咗,一早去到的關係,草上既露水仲未蒸發晒,有只小蝶停在仲有水珠既小花上,可以襯吓,唔駛又係大特寫塞爆畫面.可惜花上水珠唔係好現,如果水珠在蝴蝶上就好喇.


襯仲有水珠,盡量影多啲,小蝶只停在草上,好過冇啦.弊……大背光仲要冇帶閃燈,其實唔係一心來影蝶所以只帶咗支微距.唔緊要啦.背光有背光既味道.由穿透隻蝶既光線睇到,其實隻蝶背面塊翼係爛的.有閃燈的話就可以打光前面遮咗佢.由於要低角度的關係,叭晒地,竟然搞到成身濕晒.唔算太嚴重,曬一陣太陽就乾翻.


下午再翻來,水珠當然冇晒啦,今日目標其實係要影翠藍眼,見到佢呀,不過全部都係停地面,影完都係delete晒.冇計啦,灰蝶都殺,哈,又越影越大,見到隻眼啲毛添.呢個地方真係唔錯,交通方便,而且冇乜樹,多數位都有光線直射,尤其影細隻蝶,收多小小光圈或者加增距都冇咁易手震.

2016年11月14日 星期一

鯉魚門俾人昆

同事話不如去鯉魚門三家村,魔鬼山影相加海鮮餐,哈,轉死性喎,你班懶蟲竟然約我去啲要上山既地方.雖則係好近,咁都算有個好開始.


全副武裝上到車竟然問我路線,咁正常來講魔鬼山個景最靚,梗係Hea遊三家村再上魔鬼山影日落加夜景啦.點知居然一齊反口話唔上魔鬼山,吓......係你地話要去個喎,乜轉得咁快,算啦,咁去三家村囉,慢無目的咁去咗呢個位影日落.咁就算啦,有乜影乜囉.點知佢地連腳架都冇帶,甚至有人只帶部機仔.影影吓仲走開咗.


剛入黑就Whatsapp叫我去海鮮酒家,睇來佢地都係諗住主要來食飯就算,唔理咁多,我要影吓夜景先.求其搵咗個燈塔做前景.個燈塔基本上係全黑的.只靠酒家裏面射出來既微弱燈光長曝.最後要用三分鐘曝光個燈塔先夠光.意外收獲係超黃既燈光令到背景既藍好自然,唔似係特登執出來.好喇,去食飯,哎.....我證實咗鯉魚門食海鮮係昆人的.每人HK$340都好似冇乜嘢食咁 @@

2016年11月10日 星期四

獅山歷險

大澳是一個很遠的地方,搭車到東涌仲要再搭45分鐘巴士入去,如果要上山的話,要接近三個鐘先到目的地,所以都唔係好積極搞,又成日俾天氣玩,終於都唔記得咗由提出到成行搞咗幾耐.


睇人地網頁見獅山個角度幾好,三百幾米唔算太高,一個鐘內登頂唔算太辛苦,不過朋友又話難度四粒星喎,唔理咁多照去,一落車就係登山口算幾方便,行完樓梯後已經有啲斜,一路都仲算路線分明,行行吓仲見到人地條天線,落山搵到佢就掂,不過差唔多到頂就幾乎冇路,堆大石要爬上去咁滯,見到山頂士氣大增,沒太多考慮就上咗去,天氣又係例牌白茫茫,大景冇乜睇頭,整個遠景影大澳屋仔.暴力PS後都唔太差.


日落既方向就啱呀,不過就好側,要影到個景好細粒先影到佢,諗得兩諗仲俾舊高雲搞彎埋,算數,等夜景.個景都算幾特別.


要影翻頭先屋仔特寫就要極速換長鏡,攞支70-200mm上來真係消耗好多氣力架.喂……..做乜突然間咁大風架?呢個時候支腳架變得唔係好穏,硬係有小小矇,最後侷住開大光圈,加高ISO影,粗粗地叫做影到.早知就帶支大腳架來…….好喇,輪到最剌激既走人.頭先掉以輕心,諗住實識走.落落吓乜好似咁斜,唔對路咁既,行翻轉頭.搵咗一大輪都好似冇路咁,有啲餚底.好彩一人計短,頭先上來係影咗舊石,對翻方向,原來唔似路嗰度真係路,真係咁斜,夾硬過咗就見翻啲路喇.嚇餐死,落山好艱幸,路勁斜的關係用咗好長時間.再搭車出東涌,食飯再搭車翻屋企已經十一點幾 @@

2016年11月4日 星期五

影天橋

打風不成本該三日雨,點知好天到爆,死火,乜節目都取消晒,一時間組織唔到.求其搵個位影吓夜景就算.


在天橋上影車軌就試得多,今次試吓影行車天橋上的車軌.咁做要搵個高位,其實之前坐車經過都有諗過呢個位,不過冇再深入研究,直至見人地影得幾靚於是copycat一下. 從相的角度去搵好容易就搵到呢個位.簡單來講就係浸會醫院上的樓梯.日落方向唔啱只好等夜景.呀…影車軌有啲難度,因為大塞車.咁影到一架架車都OK既,坦白講,有時影車軌係迫不得已.夜晚快門想快都快唔到 @@


車軌既嘢,等吓就有,唔係全部係都冇所謂啦,另一個問題係Magic hour既時間真係勁短.話就話有十零分鐘,實則光線最靚既時間得一分鐘左右.如果30秒曝光的話,其實得兩張機會,如果仲要夾相既話,可能一張定生死.萬一啲車唔生性,唔係你想要既形態咁就飲恨.為咗避免咁慘既事發生,乜都唔好理影靚咗個天先,到時先夾,地面全是街燈照明,時間差小小唔會好覺.大家有冇發現兩張相個天空係完全一樣的?分開兩張影的話絶對會係唔同色.