2015年12月30日 星期三

大尾篤影星軌

今年年頭做咗一件好愚蠢既事就係1月1日去三門仔影日出.好似旺角咁多人,終於俾人踼到腳架.不過就影咗人生第一次星軌.星軌日日有,搵日冇雲同唔好咁滿月就得.不過原來冇雲係好難,日日陰天等咗好耐先等到.今次去遠小小既大尾篤,再遠搵車走會好麻煩.


現場一邊好黑,星好清,另一邊光害頗大,啲星好高吓.開個星夜行一照, Too bad,正北對正光害嗰邊.冇辦法都要硬幹.一來冬天冇銀河,二來我發覺我部機影一粒粒星始終noise係太大.照舊都係影咗個地景先,一來唔駛驚途中出現意外,二來可以用細小小光圈同低啲Iso影.跟住影個天,真係超勁光害,用翻上次既Iso 400, F1.8, 30秒一張爆晒.你可能會覺得咁咪好囉,可以再減Iso.事實係一減Iso啲星會暗咗.由於星係郁緊,只要曝光時間長過粒星移動一個身位,再長既曝光時間都唔會令星軌變光,而只會劃出更長既星軌.最後我係將曝光時間縮短至15秒.寧可影多一倍相翻去夾.15秒其實都好光吓,但加吓對比,拉吓curve該會差不多.
再提提先影地景既好處,就係個天狂加味精,搞到鬼五馬六都可以有個正常既地景,當時個天其實好淺色,搞到咁地面係好古怪的.人算不如天算,明明朝早一粒雲都冇,影影吓竟然成天都係雲.义滿電都係嘥心機,影咗20分鐘就被迫收工 @@

2015年12月25日 星期五

大井圍攝影

呢排有啲懶.專係想搵啲唔駛行餐死既地方.這地方只有百幾米高,又可近觀漁塘,決定落鎚 :P


上網講話在吳屋村後山,咁咪坐的士去到附近就問吓人囉.頭一個好好人.......呢度上去就係啦,啲先人葬係上面架嘛,吓,嘩,有啲驚喎.再搵多個人問吓.你地去嗰度做乜呀?可能佢以為我地諗住盜墓.不過行行吓真係唔多對路.冇乜明顯路線同要經過啲好陰暗地方.最後終於見到光,但唔多似要搵既地方,雖然啲樹好阻都叫做見到漁塘,點都好,影張到此一遊.

 
死火,搵錯地方點算好,好在朋友話我搵既地方應該係丫髻山山腳.就在冇遠,咁就行過去啦,果然係呢度先啱.可以近距離睇魚塘.可惜唔係日落方向,煙霞也大得看不到深圳對岸.
 
 
望翻頭先過來既山頭,見到好多屋既吳屋村,畫面幾有趣,陣間要影佢夜景先得.
 
再向右邊既景觀就普普通通.


終於等到夜晚來臨.啲屋咁近煙霞既影響唔係咁大.影到預期既效果.


最後就係影埋幾近全黑既魚塘.好彩有間村屋有燈光可以用來對焦.超級暗既環境下,最後曝光時間係兩分鐘.對岸既深圳已經爆晒光,好彩用慣用既技倆影多張夾埋就搞掂.自身發光既大厦穿透煙霞,能見度仲好過朝早.

2015年12月21日 星期一

對面海的啓發

天陰陰又想去影風景最好影夜景啦.只要唔係大煙霞影遠景又或者落出雨,通常好小食白果.驚落雨唔想上山咁冒險.就揀咗近住西貢碼頭既對面海.在山上的教堂可以用遊艇做前景,配襯岸上建築物應該都唔錯既.


碼頭早兩個站落車行過去係超級近.晨咁早來到係咁意影張日景,真係勁多船.可惜個天白茫茫加上天陰啲景物都係冇乜色彩...........


有排都未得天黑,行出去三星灣睇吓有冇位近攝遊艇.咁碼頭咪仲近?有啲唔同,高位影可以影到多啲遊艇,而且有啲山襯吓,碼頭係眼平角度,只會影到亂糟糟黐埋一堆,可惜沿途好多樹遮住.後尾仲遇到幾條狗攔路,被迫近返.咁去碼頭行吓囉.好多食海鮮地方,全部都係福島直送,受輻射影響引至生長至不正常巨大呎吋.真係想影吓,不過冇幫襯驚俾人打.咦,有隻貓表演跳起接食物,主人話佢叫可樂哥,仲出名過忌廉哥.可惜冇晒太陽唔夠快門影佢跳起,只可以影佢肖像.

 
好喇,差唔多天黑要上翻去,搵位試吓景先,走到最前應該冇錯啦.但係似乎後小小可以右面啲影多啲個彎又應該唔錯喎.仲可以唔駛咁wide小啲變形.
 
 
好啦,天色啱.........影.夜景都係收光圈,低iso,長快門咁影啦係咪?最後曝光時間係一分鐘.效果好似OK,景深夠之餘燈光的星茫都出晒.一般夜景成像.
 
 
不過.........唔好話我馬後炮,其實影之前我都有擔心過呢個問題.就係啲船會郁.如果船只係佔畫面一小部份.咁矇矇地都係一種藝術效果,有時仲希望佢畫啲軌跡出來添.但今次啲船都應該係主體,清楚會好啲.
 
 
我其實已經諗定辦法,就係開大光圈影一張前景再夾埋,最後係用到F4, 10秒快門.啲船清好多.不過俾我再揀我會用iso 200將快門再縮短到5秒.至於景深問題嘛,由於冇啲好近既物體,其實F4係夠的,就咁影完唔做夾相都得.但燈光就會變咗一個個波,冇星形咁靚囉.呢個時候發覺一個好大問題...........就係我覺得之前嗰個位原來靚啲,今次真係攞來賤 @@

2015年12月16日 星期三

獨木舟馬拉松

其實……唔係好想影,記得影過都係九里遠,點影都唔靚.不過拍擋話佢眼痛搵我幫手只好捱義氣.


原來今次唔係單純鬥快,仲要鬥耐力,總共要爬8000米.即四個圈,期間仲要每個圈搬艇上岸跑一圈,咁都好喎,影唔到水上嗰啲可以影吓人擔擔抬抬充吓數.襯住未比賽影吓人整艇又充吓數先 :P

 
比賽開始,就係咁要由起點自己抬架艇落水,慢慢行真係點影都得,Hea啲既話呢度都夠相有突 :P
 
 
 
跟住影吓人練習又呃啲 :P
 
 
終於開始比賽喇,呢張一定要打醒十三分精神,呢刻肯定係全日賽艇最密集,可以最近拍攝距離,最似比賽既相,之後肯定散晒,仲有冇機會見到兩隻艇一齊都成問題.
 
 
XYZ,翻來經過嗰程真係經對面岸,仲要貼實咁滯嗰隻,500mm影都好似影蚊咁,零出相可能,咁又係既,唔通原地旋轉180度咩?呢邊出發,好自然就係轉去對面啦.好彩,終點就在起點旁邊.可以影到衝線.竟然可以影到兩隻艇呀,真係要感謝上天.
 
 
搬咗出去,又要搬翻轉頭,已經攰到手震震,仲要做埋啲咁勞改既動作,簡直係收買人命.難得佢仲笑得出……可能係相機對住佢唔衰得 :P
 
 
 河邊冇乜好影,走去影吓人跑圈先.原來有水站,啱晒.不過咪駛旨意可以影到跑步嗰啲粗暴飲水行為,捱完勞改,仲抬住咁大架艇,企都未企得隠啦.呢位女士見佢真係好辛苦,扯晒蝦咁.我真係驚佢中途頂唔順要搵人救.希望佢飲完水之後會好啲.除咗水之外,仲有蕉同朱古力食,搞到我食完晏都想攞翻隻蕉添 :P
 
 
下午既賽事竟然加碼到5個圈,真係悶到嘔電.好彩去到起點原來有得上船影喎,咁又唔同,可以認真影吓比賽.船係停喺對正轉彎90度角既位置.雖則有船,但係要留翻咁上下遠俾比賽既船過,唔可以太近,其實都要用到接近400mm焦距,頭嗰幾位實力接近到無法相信,第一個圈一齊過,到第四個圈都仲係一齊過.灟咗講天氣,係勁陰天,為咗唔想啲水變成全白冇晒紋,個個運動員都變晒非洲人 @@
 
 
今次啲獨木舟冇乜規範,單人又得,雙人又得,仲有呢種叫做C艇,只用一隻槳既都得.可惜睇來係搵自己笨,我見佢已經落後咗一個圈.船夫好識做叫我唔我等,早啲送我上岸走,真係要俾個Like佢.
 


2015年12月11日 星期五

熱血高校閃避球

 
唔知大家有冇玩過呢隻超任時代既Game呢?我一向都以為係老作出來既運動.嗰陣最開心就係出到絶招,掟到啲人申晒脷,凸晒眼.不過……原來真係有呢種比賽的.而且仲有兩種玩法.


第一種玩法我覺得比較正式,有兩堆人對戰,分別佔球場兩邊.波只有一個,玩法就係攞到波就可以掟人,被掟中就要out. Out晒就輸.不過冇咁直接.因為得一個波,只要走遠啲其實夠時間避.有機會掟極都有人.所以對方可以安排人在球場四邊.只要接到自己人掟出既波,就可以用來攻擊.分分鐘由極遠距離變咗就喺前面,好難避得切.咁防守都唔係坐以待弊既,只要接得住攻擊既波,就可以據為己有,又或者對方接唔到自己人掟出既球出咗界,咁都可以有掟波權.講咗咁多球例,講翻影相.場中又係人,場外又係人,加埋裁判,簡直人山人海,亂過亂世佳人.就算開盡光圈影特寫都係亂到七彩@@

 
影進攻都有啲路捉吓,影防守真係超高難度,都唔知佢想掟邊,又唔想太wide亂晒大籠.我結果都係等佢Out得七七八八冇乜人剩先影,唔係掟A就掟B冇咁難估.後面都見到藍衫對方球員,真係四面楚歌.
 
 
影到我頭暈,都係影另一種舒服啲.這個比較直接,有好多波.執到就互毆,對方冇晒人就贏.一開始係擺幾個波在中線,兩隊互相派人衝前攞波就可以攻擊.由於一攞完波距離好近,戰況好慘烈.
 
 
之後多數會就住就住,冇咁搏.好多時後排投射就算.因為一衝前掟完波冇波在手好易俾人還拖得手.要影掟波比剛才得一個波易得多.
 
 
仲可以搵人幫手執波,保證子彈源源不絶.
 
 
防守一方就要集中精神唔好俾人掟中,我見過剩翻一個點都掟唔死,跟住搞掂咗對方三個反勝都有.
 
 
嘩,咁多波點避呀?其實睇真啲真正攻擊既波只有兩個.
 
 
同你死過,就算波波橫飛都要衝呀………
 
 
 
 

2015年12月7日 星期一

上太墩影千島海

自從去過大欖涌水塘影千島湖後,好想搵吓第二度有冇類似既景.上網得知斬竹灣內海一樣有好多島.要去影有兩個地點可以選擇,太墩地勢高啲角度好啲,不過……難度又係4粒星,上山路徑不明顯,冇遮冇擋,對體能有一定要求,乜又係咁架,有啲餚底.另一個選擇可以去長山,難度兩粒星,老小咸宜,但矮咁多.啲島黐埋一堆.去咗都係會心思思要去多次太墩.死就死啦.


食個飽既午餐,帶1.2公升水,遮太陽帽同勞工手襪同佢死過,入口唔太難搵,北潭涌停車場有絲帶引路.草真係好密,遮晒條路,不過只要一路低頭其實唔會點迷路.路上耐唔耐都會有有心人留低絲帶,初段又唔覺得好難行喎,到咗中段就知味道,冇大欖涌咁難但路長好多.千辛萬苦終於到頂,千島海景觀真係開揚.可惜天色麻麻地,明明朝早都勁曬,上到來竟然天陰陰,等一陣睇吓會唔會啲雲散開,因為一冇陽光啲水變晒白色好樣衰的.好彩真係等等吓雲中散出一絲陽光,嗱嗱聲狂影.


雖然有陽光,但天涼煙霞比較大,個景又比較遠,始終係矇矇地,冇計啦,成事在天,不過天涼又舒服得多,我竟然支大水都未飲晒.影多個唔同角度先.


最後影多張wide景就算.等咗成個鐘先等到啲雲離開個天現到啲藍色.可惜好多島嗰邊都仲係白茫茫.算喇,襯天未黑要快啲落山,嗰條路事實上頗危險,啲草同樹枝突晒出來,唔着條夠厚既褲對腳肯定花晒,如果唔小心跣一跣俾樹枝插到分分鐘死得,一定要好小心慢慢落.


最後可能有人有興去翻轉,就貼張地圖大家參考吓啦.只要唔好心急,慢慢上,慢慢落就冇大問題

2015年12月2日 星期三

雲泉仙館菊花展

上星期好天到爆,但係我好攰,唔想又登山,唔去影相喺屋企Hea又好似好嘥,咁啱有人話雲泉仙館有菊花展,有車直到唔駛行啱晒何呎.


除咗一朵朵既菊花之外,仲有好多用花砌既擺設,不過幾乎大部份都係炒冷飯,同往年既一模一樣,用條金龍開齋先.哎呀…用綠色既草做龍身,配上綠色既草做背景,超級正光影住勁反光既龍頭同龍爪,後果就係龍身隠咗形.得翻個頭同啲爪凌空,非常鬼異 XD

 
啲公仔都係咪搞,影翻花算數,影啲易影既先,紫色花配綠底最易影,只要搵個有光到,較遠既背景,就好容易拍出明亮的感覺.

 
越淺色既花越難處理,用翻影紫色花既設定照影多數朵花會爆晒,爆好易搞啫,影翻暗啲就得,不過隨之而來既副作就係變咗夜影,背景幾近全黑.總之唔多啱我,所以我一定帶埋閃燈,唔係幫花補光,反而係背景.
 
 
哈哈,關心背景多過關心朵花 :P
 
 
除咗菊花,仲有不知名既花,都幾得意,但菊花靚啲.
 
 
仲係講背景,除咗顏色同光暗外,唔好亂都好緊要的,最簡單既做法就係影特寫,只要放大率夠大,除非背景好貼,否則就算收光圈都可以好散,問題喇,變咗全部畫面都係得一兩朵花.於是我又留意吓啲細細朵又生得密啲既小菊花.咁就算放到好大都可以見到好多朵喇,當然只可以有一朵清啦.
 
 
來到最難影既白色花,搵勻都搵唔到夠遠既背景,搞到有啲亂添,但顏色我又幾喜歡 :P