2015年11月27日 星期五

影戴勝

朋友問我去唔去影一隻近排在Facebook洗版,叫戴勝既雀…….影雀呢家嘢我一向麻麻地.我啲架生去香港公園影吓啲發呆既雀,或者去街市影吓雞販啲雞就得啫.影野生雀鳥九里遠,幾乎個對焦點仲大過隻雀,crop到好似40倍數碼變焦咁影完都係刪除既多.仲要特別去搵,見唔見到都成問題.後尾查吓原來隻雀係好乖的,唔多郁,咁又去試吓.


隻雀出沒地點係屯門公園,但公園咁大,隻雀咁細,點搵?好彩有人帶路,去到就知唔難搵,因為見到有幾十人圍埋一齊嗰度就係.可惜,佢停嗰個位係樹陰,好暗.Iso 800都係得1/80秒快門.侷住用到Iso 1250,啲相頗粗吓亦好多失敗.影兩影仲飛走埋(仲以為佢唔識飛添),諗住冇得影啦,原來有第二轉,個位光啲,可惜卡唔到位,冇乜點影又飛走.原來仲有第三轉,咁好既雀真係未見過.今次搵到位喇.背景唔多靚但正光.隻雀毛色好靚但食呢啲 @@


雖說係正光,但下午四點幾既陽光頗柔和,Iso 800都只有1/250秒快門.個頭郁得快嗰啲炒晒.背景其實都冇得揀,幾十人圍住有位影已經好好,仲郁來郁去分分鐘俾人打.呢張背景唔駛係白色牆算係咁.


為咗同隻雀眼平取景,我同旁邊既人都係叭地影,壓住個肺真係好辛苦,快門唔夠快其實變化就冇乜,人地係影佢捉到條蟲掟起在空中嗰吓的.但光圈細要加到好高Iso,我又唔想咁粗所以就冇收獲喇.


除咗空中蟲,另一樣要影既就係開冠,由於我取景太Tight既關係,有好多出咗界.有啲又唔夠快門矇咗,最後就係得呢張角度麻麻既.事後查翻隻雀係同彿教有關.可能開冠嗰吓有啲似唐三藏呱?

2015年11月23日 星期一

搬翻轉頭

人類總係要重覆犯同樣既錯誤.Wordpress用得好好地地,好學唔學又走去改版,改咪改囉,竟然改到唔俾放大相,今時今日,是但登記個雲端都送幾G俾你用啦,Facebook 日日咁多相都容許2048 x 1365啦,唔係咁小家呱?手機都4K屏幕啦,得569 x 379即係叫人回到石器時代.作為主要講攝影既我,咁係接受唔到囉.
真係麻煩,又要搵新地方,Yahoo建議的隨意窩,Weshare又係問題一蘿蘿,試過搞微博,都係唔掂,搵來搵去好似就係得Blogspot可以放到大相.不過係出晒界,而且冇回覆,只可留言,有網友提我用新版本,之前因為唔想連到Google +所以冇用.一於試吓,結果相係冇再出界,又可放大,基本要求已達,至於冇得回覆問題,有網友話用手機睇就見到,又真係見到喎,不過回覆之後係會變咗留言.算啦,都冇得揀,OK, 大家乾杯,入伙快樂.