2013年9月20日 星期五

摺完又摺


Yahoo摺埋搞到搬咗來呢度,但我呢個電腦盲搞到亂七八糟.實在係睇見都唔開胃.相出晒界,內容超窄,又冇得回覆,所以我決定再搬一次,新地址係http://mokphilip.wordpress.com/

其實都係唔多搞得好,不過合乎我最起碼要求,希望有緣再見

2013年9月9日 星期一

影游水


我之前只影過一次游水,不過係傷殘人士的.今次先係第一次影正式既游水比賽


不過.......泳池邊只俾兩個人落去影,即係只可以輪流落去,未排到既就只可以在觀眾席影,咁都算啦.仲要近前半邊池觀眾席係留翻俾運動員,要影只可以去真正既山頂位影,但係我冇600mm F4.唯有去池尾用盡200mm影吓泳帽,最慘仲要係大背光,F2.8都只係啱啱夠,後尾我都有攞支200-500mm出來影,不過用到iso 3200都唔夠而且noise多到好似落雪咁,最後係一張有用既都冇.


好不容易捱到可以落池邊,第一件事係影吓起跳啦,原來好鬼難影的.對焦其實可以對定先,主要係唔夠快門速度.衝前嗰吓真係好快.搞咗好多張遇到跳得比較高既冇咁衝既先影到.


半空中既真係好難影,為咗保證有相.........呵呵..........哈哈,影未跳嗰吓係一個辦法.其實都跳緊架,中間有一個人偷步哦.


跟住自然係要影齊四式啦,首先影蝶式,原來又係好難影的,我原本想影正面,但係通道真係超窄,運動員又行來行去,好似好阻佢地咁.試咗一陣就放棄咗,其實個頭打開既時間真係好短,好多時對焦都對唔切,又或者對得中但對手又唔係張到最開.終於走翻去側邊影.氣勢真係差好遠.


最好影既係背泳,因為塊面永遠向上.除咗有時會被水花蓋過,係咁狂影多數有相.要考慮既只有隻手擺位靚唔靚.話就話池邊影咋,其實200mm都係最多影到三條線左右.不過第一線多數唔開,所以實質上只有兩條線影.其中一個方法就係唔影咁大頭,影兩個人比拚.不過要碰碰運氣啦.好彩今日啲人實力幾平均,經常有兩個人甚至以上既畫面.


跟住係蛙泳,都算易影,一下一下,節奏唔太難估.停留既時間亦冇蝶式咁短.


最後就係速度最快既捷泳,好多人叫自由式,其實係唔啱既,自由式意思係你用乜泳式都得,但由於捷泳係最快,所以個個都游捷泳.捷泳是側邊呼吸,企池側應該對到正好易影,不過實情係有水準既泳手係唔多呼吸的,兩三啖氣就游晒成個池.你企唔啱位就只可以影水花.
寫到呢度真係覺得自己個Blog好核突,啲相出晒界,文字窄到死,又冇回覆框,又冇留言通知,除咗可以放大相就冇乜好處.坦白講想再搬,搵緊新地方.


2013年9月3日 星期二

大失所望美式足球


呢個好遲先通知有得影,但係未影過所以點都要抽時間去一去.比賽只有一場,應該好快打完,要打醒十二分精神,唔太多機會影.


睇電視見人地美國嗰啲係好衝撞性的,可以夾硬撞到成個人飛起,幾茅都得.所以要戴晒頭盔,護甲.但今日所見真係悶到嘔白泡.多數都係開波唔夠兩秒就成堆人黐埋一舊.好多時連波都未搵到來影已經又吹雞.同埋佢地好唔乾脆,點樣開波都可以商量幾分鐘,等多過影,好難得先有一次仲見到波未變成人山.


,又跌低冇得跑.又要再開波,我拍檔影咗一陣,話睇死佢永遠都過唔到來,都係去場中間影算數,咁無謂個個走晒,我就留守底線啦.


等多過影唔係好對路,都係影吓開波攬芋充數先,陣間唔夠相就弊.


原來吹停時間係唔計鐘的,唔駛估都肯定係停既時間多過比賽時間.見啲球員一啲都唔急,慢慢商量好晒先開波,同七人攬球嗰種緊氣氛完全係兩回事.連射波都可以搵人按定再度幾次位先射的,真係俾佢悶到就來發火.


終於有人可以衝出重圍,其實佢打法同攬球差唔多,只係多咗個頭盔,諗住好勁點知就大失所望,算啦,影一次見識吓,下次都咪搞.

2013年8月31日 星期六

新生活


原來不知不覺已在Yahoo Blog待了六個年頭.初初都係諗住用來聯絡下知識plus既朋友,搞搞吓就變咗一種習慣.坦白講Yahoo真係我見過最差勁既平台.唔見相又有,發表唔到網誌又有,最慘係管理嗰啲人係完全無視所有問題,連回覆都係電腦自動回,回咗就算.一路都唔走係因為寫咗好多網誌同既有好多Blog友唔捨得.依家終於都執笠,唔到唔搬.


咁究竟要搬去邊呢?搵個幾個但都只係可以放細相.有一個仲居然要限容量,依家都2013年啦.1 Tb限碟都幾乎就來冇得賣,點會仲咁計較架.再繼續留意人地既動向,原來呢度就可以.放個煙火慶祝吓.


現在的企業都向錢看,一冇錢賺就取消所有服務支援.你有甚麼損失真係關人.寫咗六年既網誌恐怕沒有了.就算佢話幫你轉都應該會變晒怪獸.叫做好過冇.又有傳Sony唔再出A-mount相機,啲鏡頭恐怕要攞去賤賣或者填海.Well,世界就係咁,不斷有人和事物消失.其實也不必太堅持話一定要保留.辛辛苦苦將VHS轉成DVD又如何?皇后碼頭冇咗其實大家都係咁生活.網誌會再翻看嗎?(事實上我會).但要消失既始終留唔住.不如向前看吧,過程中Happy咗就最實際,永遠都係用咗冇得消失.舞個龍慶祝新生活吧...............Goggle都話唔定幾時會執架.