2017年8月18日 星期五

四探蛇嶺

印象中應該係第四次來蛇嶺.頭一次見到蛇嶺個箭咀照入諗住冇死,點知係村,路被關上鐡閘,第二次自己睇地圖搵咗個比較似樣既入口,點知又係入咗唔知乜村,喂,老友,你入來做乜?影日落,去馬草壟啦.再三睇清楚入口係罐頭形軍營,罐頭呢兩個字好關鍵,因為係有兩個軍營,同小巴司機講話軍營落有九成機會落錯車.終於搵啱路喇,不過超大霧,而且超大風,未到拍攝點已經掉頭走.襯住好天,帶隊去多次個咁隠閉既地方,司機好醒,一睇就知我地係去影相,仲懶叻咁教我地去馬草壟,我試過好多次,無論問任何人,都一定係叫你去馬草壟.冇人知蛇嶺係可以影相的.到我話要落車嗰吓大家都好驚訝,今次來條路啲草長咗好多,幾乎遮晒條路,我都有啲猶疑以為行錯路,好彩有村民指示話啱路先敢剷草入去.


路斜度很細而且得一條路,包唔會迷途,大約45分鐘就可以登頂,標高柱寫住鐡坑山,可能呢個先係真名.上次來日落非常遠,會有兩個山頭遮住,應該係季節唔同,位置改咗,再冇被山遮住,由標高柱過去拍攝點要走一小段路徑不明顯既山頭.驚要剷林帶埋勞工手套來,不過原來好平坦,慳翻唔駛用.


跟住自然係影埋夜景.呢度個景實際上跟馬草壟好相似,事實上向東望係可以睇到馬草壟.不過梗係照影啦.

2017年8月14日 星期一

變了樣觀景山

有小小時間又唔想咁辛苦,決定去景麻麻但方便的觀景山,入到東涌計距離其實好遠,不過屋企樓下有機場巴士一程車就到.


山高100m都冇,一陣間就上到頂,咦,唔多妥,周圍啲草都生得頗高,已經企標高柱旁邊,zoom到50mm都仲係見到好多草,香港啲觀景台好多都係咁.多數都不及民間自行發掘既觀景位.


諗住來影油庫日落嗰邊仲慘,樹高到幾乎遮晒啲油鼓咁滯,已經知道油庫個景一定唔及青衣南灣角,但估唔到差成咁,其實今日天色算幾靚架,算啦,影多啲個天.

來到夜景時間,油庫夜景真係一啲睇頭都冇,改個方向,影翻過去一號大樓嗰邊,平時去機場巴士就係行呢條路喇.這個景雖然有啲亂,都叫做見到星芒,飛機啦,可惜前面嗰舊草真係好大,夾埋真係麻麻地.


撈埋汁,去翻標高柱影埋啱啱來個景既夜景,時間其實有點遲,天已經比較暗,求其影一張就收工.

2017年8月9日 星期三

上環影景

酷熱天氣警告,雖然天清氣朗我都會唔怕死照上山,但係煙霞就仲衰過落雨,多得朋友既關係,帶我地到私人高層停車場影吓上環街景.唔駛行,冇冷氣都唔會中暑.


景觀頗開揚.東面可以睇到港澳碼頭,對面係維港.可惜向東,拍不到日落,夜景該不錯,仲有個直昇機場,早知就帶埋長鏡來啦,諗住對抗玻璃反光既黑布反而用不着,因為係不用隔着玻璃的.


日落方向可以見到上環街景,太陽位置又冇被大厦遮住真係幾好,可惜煙霞太大,搞到灰灰咁.否則就算清水疍都應該唔錯.


咁最後梗係等夜景啦.唔怪得我老婆成日話我對眼係用來裝飾,竟然冇留意到條車軌係被楝大厦斬斷咗,好在有人提出,否則變咗斷開車軌 :P

2017年8月4日 星期五

深圳動漫節

香港動漫展實在太多人喇.淨係排隊入場都要一個鐘,已經好耐冇去.只係想輕鬆宅一宅的話,對岸都有一個選擇.


近排係咁落雨,室內活動就唔會因為突然落雨要取消咁掃興.我最喜歡其實係呢類大呎吋展品,一來通常做得比較精細,二來夠大唔會有景深唔夠問題,可以盡情開大光圈影,但最最最唔好係通常下面係圍欄,影全身就會穿崩,所以架Batman電單車就要犠牲喇,得翻小小.


細件展品其實有好多都好靚,但近來影既興趣開始減退,始終有塊玻璃擋住係大殺風景,勁反光背景又雜,點影翻去都係會變垃圾,求其影啲紀錄吓就算.


來到影cosplayer一樣係好有問題,四處都係model但四處背景都花到慘不忍睹.睇翻以前啲相真係想剷晒佢.咦,有大會model喎,可以影翻張冇咁花既,原本想影正面,但係前面嗰堆毛筆會遮到面,唯有斜斜地.


又有好嘢,大會整咗個場景俾人影相,實在好過出面太多喇,就算個景幾唔靚,起碼背景都唔會係一個個黑黑既人頭.我喺度影咗頗多相.缺點就係裏面只容得下一個或一組model(唔會三唔識七走埋一齊影合照呱?),有某啲原因唔係好想影但佢又霸住好耐就會虛耗光陰.


所以出面既都係要影既,咁背景既問題又點算呢?我既方法就係........ 用地下做背景.唔太斜既話感覺上都可以,但係要做到背景上一個人都冇除非叫model瞓喺度,事實上呢張相背景上係有好多腳的.我要等到剛好冇腳黐到model先影,咁我就可以好容易在後制時執走啲腳.黐到就會難搞好多,所以model好奇怪,明明俾晒眼神你又唔影,唔望你又狂影,傻佬來的.

終於等到呢個白紙背景喇,我記得上次來都有人特登用兩支燈架set呢個背景,所以一路都留意住,可惜我得一條友攞唔到咁多嘢,否則我都想咁做,背景花既話點影都係垃圾,就算F1.0光圈都搞唔掂.啲cosplayer落重本做靚衫都係嘥晒,不過如果背景有啲顏色會好啲既.純白有啲似大背光背景過曝咁囉.

嘩,cosplayer大合照,個個都想影到呢張相,結果就係迫爆人,連側邊位都冇晒.但企到咁近實際上係影唔到的,除非用魚眼或者超廣角鏡.一來未必人人有,二來用到咁極端焦距都變晒形啦.主持人就呼籲,為咗大家都影到,影得靚,不如一齊後退三步.我最贊成,不過成世溜溜長,總會遇到幾個人渣.竟然有人襯住其他人退既時候就攝前面.鬧極都唔走,無頼到極點,算喇,人地地頭無謂搞事,就咁舉機過頭影張紀錄相,用24mm都搞成咁,爭到最前都唔知影啲乜.......

2017年7月31日 星期一

虎山行

連場大雨終於有一日比較好天,但又唔係好敢搏去啲辛苦路線,萬一中途落雨唔單只食白果,仲可能要冒雨落山,分分鐘有性命危險,大澳虎山雖然車程遠咗啲,不過要行既唔多,落雨最多只係白行一趟.


這裏是白海豚觀景台,不過跟過旅行團既你都應該知啦,就算有幸遇到都只會見到一個白點.山上既雕像擺位亦都好奇怪,冇辦法影到正面.仲未得日落,影吓個山景,同埋搵吓影屋仔既位喺邊度,原來都好近,唔駛日落後走來走去趕下場.


太陽好快就被雲層遮住,日落又落空,右面有一堆橙色好怪既物體,但面積又好細,換咗長鏡影只得一片橙色冇乜睇頭,諗住等多陣就去影屋仔夜景.發呆期間橙色物體突然極速擴大,變成火燒天,從來未見過,靚到不得了,手忙腳亂立即換翻wide鏡,混亂中影咗一張,點知另外一邊燒得仲勁,九秒九跑去起壇,老人家手腳慢起得來已經燒完.


好啦,走去影屋仔夜景.點知超級大風,腳架都吹跌.死火,影極都矇,而且唔知點解個天黑得勁快,想等陣間冇風都唔得,唯有開大光圈,加高小小ISO搏搏,好彩都有張sharp,星芒就冇乜喇.影風景既嘢有時好難講,諗住十拿九穏既夜景幾乎槓龜,冇期望既日落又影到火燒雲.

2017年7月26日 星期三

學界龍獅賽

原本諗住去影跆拳道黑帶賽,飛身踢頭既畫面,無奈個比賽好似唔多想俾人睇咁,觀眾席只有自己人,仲排一個選手觀眾席係遮住公眾視線.好彩仲有Plan B,變咗去影學界龍獅賽.

咁樣搞一搞,要下午要來到.其實我係比較想影舞龍多過舞獅.見到有學生拉龍出門口,唔通想喺出面練吓先?再睇睇節目表.哎呀呀.....哎呀呀,原來舞龍已經在上午完晒喇.下午得翻舞獅,通常精彩既都留翻最尾架嘛,今次.........


冇計,專心影舞獅,我哋知道有採青,原來有分好多種,好多組都係玩呢種醉青,除咗舞來舞去之外,仲會扮吓醉,左搖搖,右搖搖,好似打醉拳咁.


一隻獅子只得兩個人玩參與率太小,其他人可以去打鼓打查查.小朋友,太可愛了,打鼓會不會太粗重了?


仲有一樣好熱門既係盆青,雖然醉都淨係對住個酒樽.但都有啲飲酒,醉酒動作,對住個盆,真係好難幻想到獅子點解會咁興奮.只好影吓啲跳起動作啦.


跟住有蟹青,照計獅子好難搵得到蟹食,一個陸上,一個水裏,或者去飲水時捉來食呱?盆青有時會跳吓上個盆度,蟹青純係虐待隻蟹.整到斷手斷腳之後仲要唔食一嘢掉咗佢,夠晒衰格.


之後仲有蛇青,做乜獅子食得咁古怪?而且其實唔係食既,將條蛇Fing一輪之後又係掉咗佢,超級唔環保.仲有乜青呢?竟然係地青.聽個名都知係乜道具都冇,就咁行來行去,俾小學雞中既小學雞玩既,休息吓睇吓相算數,費事嘥電.

 
悶咗一大輪之後開始擺陣,似乎有啲睇頭,不過原來都係行來行去居多.同想像中好大出入,算了時間也不早,早點收工翻屋企食飯.

2017年7月21日 星期五

西部通道攝影

想去影呢道成個月但一路都去唔成,上網查過資料,要7點半先開燈,仲遲過青馬大橋.必定要在比較遲天黑既日子先可以影到最佳光線.天公不做美,夏至以來個個星期都落雨.日照時間一日比一日短,真令人焦急,原本星期日我多數唔會出發,因為第二朝要翻早,但難得有一日係好天,夜就夜啦.網上資料係坐入下白泥既小巴在橋底落車行上去就係.不過其實入口係三义路,方向不清既話好易會去咗垂真對橋既位置,又或者唔知去咗邊,好彩我有人帶路至冇搞錯.


山頭上面好大,但啱位影既地方其實好小,最多放到4至5支腳架.24-70mm的話會影到好多無謂嘢.幸好我有帶135mm同埋1.4x增距.最後真係要用晒先啱心水.向西原本期望有日落,多雲之餘方向都唔啱,反而係去錯垂直方向嗰邊會啱啲,時間慢慢過去,估唔到7點半個天仲幾光.大概是向西的關係吧.景得一個,相自然最後就得一張.咪諗住用幾耐來就用幾多時間走,下白泥既小巴一定上滿先出來,亦一定唔會有人中途落車,要硬食行出去流浮山,所以見到有的士的話,唔好俾佢走 :P