2018年2月21日 星期三

細山走錯路

前排天氣涷,上高山的話,等影夜景肯定變雪條,着得衫多除咗上山好熱之外仲加重負擔,都係唔好咁艱辛先,記得經細山去三支香途中經過一個位可以影到油庫及青馬橋.就揀佢做今次目標.



得一條路照計唔會行錯,就係咁邪,竟然搵唔翻個位.唔通行得未夠高?其實嗰個位係咪完全冇遮冇擋我印象都頗模糊,撞撞吓去咗一條分义路,都OK喎,雖然有小小草阻住,不過日落時間就到,費事去搵,就地影就算數.啲草其實幾阻吓.最終zoom到50mm都避唔晒,唔可以再zoom喇,否則變咗特寫.



之後就係等夜景,普普通通咁啦,其實試咗啲新技巧,不過失敗咗無謂多講.



之後就係轉角度影埋有青馬橋嗰邊.又zoom到50mm.但依然有兩條好長既草遮住,易得爬出小小剪咗佢.最後怕死.事後除草的難度非常高.雖然只係兩條草,但好近既關係化到好大片.我見人地用印章工具慢慢續小搞執得好完美.跟住試咗一輪,實在太煩喇.個景唔值得我咁花時間,求其內容感知刪咗佢就算.唔細心睇都OK啦.

2018年2月15日 星期四

微縮藝術展

近排冇乜落雨,但好涷之餘仲有一樣問題,部份地區能見度低.咁唔代表其他地區能見度就高,只係冇咁低.外拍冇計又有人話去影呢啲,咁就去啦.


呢啲展品其實出過好多次啦,好多都熟口熟面,咁又係,整得咁辛苦唔通用一次就拆咩?呢條舞火龍我上次都見過啦.不過今次試吓用全片幅影.事後睇翻好似仲衰,景深太淺唔多掂.即使用到F11光圈,景深都唔夠同時覆蓋啲人仔同龍頭.


好彩係朝早去,而展覽場地又係露天,即係夠光,縮光圈到F13再試,勉強叫做夠景深.但係又變咗好似用電話影咁,都唔知自己想點.


幾乎個個出相都係會出呢個景,淺景深用在一架平面既電車上最合理不過,夠夢幻好似係特登用移軸鏡影實景咁.


除咗景深外,另外一樣好麻煩既係啲射燈,展覽會經常都係咁,又唔係珠寶展覽,淨係要突出隻鑽石介子就話啫,呢啲景個個都係睇成個景架啦.做乜好似全世界得一種燈咁.打到某啲位爆晒,又唔用得腳架影兩張夾埋,真正係考驗你部機既動態範圍.


襯人多混亂,我玩咗個Top shot.有反mon真係好,我見好多人盲拍,其實係好難成功既,我都估唔到原來要伸到好入,幾乎唔夠手長,盲拍多數只會影到半張枱.影大平面夠晒景深,係咪有啲航拍feel?


非常簡單既一個場景,但原來縮到F16光圈都唔夠景深覆蓋個人同啲揮春,全片幅真麻煩,唔緊要,影細小小再裁大就搞掂.坦白講用到F16真係好盡,銳利度明顯睇到差咗.只叫做仲用得.又到新年,借啲揮春同大家拜年,祝大家財源廣進達九江,生意興隆通九海啦.呵呵.

2018年2月11日 星期日

帆船嘉年華

朋友叫我去既時候我同佢講,岸邊冇乜好影喎,淨係影到一隻隻帆船喺海度咁囉.都冇諗住去,放假但天氣好灰,影風景冇乜行,又冇其他地方去,咁就去啦.

 
除咗帆船比賽外,仲有嘉年華,即係有啲表演,有賣嘢食,有賣體育用品,冇賣廣告咁啦. Volvo 有嘢俾人玩,最受歡迎,這個控制剷泥車的攤位可以考驗自己對機械的控制能力.其實我想睇吓有冇人暴力操控,一嘢拉甩嗰塊版,哈.
 


呢個搭車遊戲都幾似過山車慢版,我同朋友都有衝動想玩,不過原來已經派晒籌,下午請早.


章程話11時會有比賽,不過通常都係例遲,現場係乜指示都冇,包括冇觀眾席,不過有講起點同終點都係碼頭呢度,咁喺度捕疍都應該係最正路選擇.終於等到出發,想像中既千帆並舉畫面並沒有出現.只係一隻隻慢慢出,仲要帆都冇開,唔通係計時賽?只好等衝終點啦.


食完嘢好似都係冇乜動靜,章程話兩點有全日主力港外賽,但碼頭啲船都走晒喎,唔通出面係起點,鬥快翻緊來?見冇嘢做,同朋友講不如上天台行吓.好彩咋,原來呢度先睇到比賽,觀眾席都係冇既,邊度睇到就邊度睇啦.最終搵到張長凳做後排攻擊.隻船拗到咁斜應該都係高手來既.


我想畫面盡量多船,好彩係繞圈賽,都俾我影到三隻同時出現既畫面.


旁邊好多大大小小既船為咗今次比賽停喺度,有啲係大會拍攝既船隻(其實一定要上船先影到運動員拚搏畫面,我地遠炒只係搞搞震),更多既係有錢人觀眾席.


坦白講都幾悶,完全感受唔到速度感,船去得更急似乎就快完,跟住真係完咗,點解會知?因為全部觀眾船一齊離開,仲壯觀過真正比賽

2018年2月6日 星期二

摩天輪重開

一直都想去影呢個例景,到真係的起心肝既時候竟然係易手,天真的我以為第二日就會重開,實際一搞就幾個月.坦白講摩天輪冇開燈真係唔好嘥時間影.......


之前試過喺天橋影,其實都OK的,景會有點太近而且四周太多人,今次去咗IFC平台清靜得多,但就勁涷,等到天色差唔多先硬住頭皮出去.普通夜景冇乜難度.只係摩天輪中間既字爆咗光唔係太好睇.不過只要影多張夾埋就得.由於爆光位好工整,非常容易圈選出來,漸變都唔駛.


之後就係9秒9衝去另一面影第二個構圖,天色黑得勁快,已經過咗最佳天色.除咗摩天輪中間既字外,環球嘉年華既燈光都好爆吓.懶得影多張,就用原本嗰張推盡highlight去解決,成張較的話會搞到好灰,所以又係疊相再露出呢忽.


最後就係利用爭取到既時間影埋個大啲既摩天輪喇.

2018年2月1日 星期四

機場維修區

呢度大大話來過四五次,聽人講可以見到飛機由頭頂飛過,好似松山機場跑尾既經驗,但係我就一次都未遇過.聽過係航班編排問題.原本我冇諗住再來,但成班人又話要影相,又話怕辛苦,要去啲車直到既地方,個地方唔係我提議,但難得有人出主意.我附和咗.


冇飛機既話,可以用條橋做前景,影吓日落,不過今日清水疍,當係陪吓朋友囉,有意裁花花不發,竟然第一次見到有飛機從遠處飛來.即刻嗱嗱聲改快個快門涷結架飛機.對焦其實唔駛,咁wide乜都變晒超景深.架飛機郁緊照計唔可以影兩張夾埋.實質又唔係,只要等架飛機完全走晒先影第二張就得.架飛機都真係有松山機場咁近,但降落地方就遠好多而且被鐡線網遮住晒,冇得影.


跟住來到夜景,個景講真不怎樣,天全黑之前仲有一架飛機飛過,要涷結佢唔夠光,影光軌又似乎要搞好耐,朋友冇乜耐性,結果求其影吓條街就算,收工開車去食飯.

2018年1月27日 星期六

又到馬拉松

又到一年一度渣打馬拉松.已經影咗咁多年,坦白講熱情有啲消減,影來影去都係差唔多,唯一唔同係可以試吓全片幅在夜晚既表現會好過APS-C幾多.


老人家唔捱得,都係揀啲唔駛咁早起身既位置就算喇.最終派咗去西隧入口,好吖,我去過一次都唔錯,照舊搭通宵小巴去到旺角再轉的士.點知度度封晒路,搭咗75蚊,結果只係佐敦站掉低我,行餐死仲幾乎遲到,新機真係差好遠,F1.8, iso 3200將快門谷到1/200秒.終於可以影到個人sharp而背景又唔會太黑既相,尤其係對焦,有信心得多,接近一半中,A77既話幾乎冇張得.


捱到就快天光,個天藍藍地好過淨係得街燈,iso 都可以降翻去 1600.


跟住就係等全馬既黑人跑手,全世界都係等呢張相,冇行開或者瞓着既話應該唔會灟,事關佢地到之前仲會有開路電單車,計時車,同埋電視台直播車,本來大家各就各位,你唔阻我,我唔阻你相安無事,點知大家狂影之際我前面原本坐低地面嗰個人突然企起身擋住我,原來佢要擰轉頭影電視台採訪車正面,你仲有冇自私啲呀?可能佢都知自己衰,一點完即刻雞咁腳走.好在之前影得冇咁大既都有啲中啫,裁裁都用得.

影完男子組黑人到女子組,又係前面有加開路電單車的,不過上年都係,唔知點解架電單車係好近啲運動員既.變咗好難影正面,甚至側側地影都有啲阻,我就聽到有人大聲爆粗鬧.  @@


今日除咗條恐龍之外(俾人阻住影唔到).就好似冇乜特別鬼馬裝扮.美國隊太求其喇,連盾都冇.


原本諗住上天橋影吓好多人既畫面,可能時間尚早,硬係好疏落,唔等喇,要行西隧過對面海順便影西隧裏面.由於入口係斜落,有利影到後面好多人既畫面.


行餐死終於出咗西隧.啲人開始抽筋,影吓佢地先


呢個畫面其實唔出得街,因為要企上路肩先可以咁高角度影,實際上係禁止的,我都俾人叫翻落來,不過影相既嘢大家知啦.行遠小小冇人見到又上過 :P

2018年1月22日 星期一

春秧街第二擊

除咗大水管,春秧街都有第二擊. 上次去春秧街影電車見到附近天橋好多白鴿,但當時最長只有支85mm,貪得意影張幾張飛鴿,勁裁之後竟然都唔係太差喎.決定帶啱架生再來多轉專登影白鴿.


雖然係戶外,但由於四邊都係大厦遮住晒,陽光沒法直射,全程都係光線不足下影的,但快門又不能夠太慢,我帶咗70-200mm F2.8同埋135mm F1.8,最後都係要135mm,開盡光圈先夠光,實際上已經用到Iso 1000. 冇數次練習後終於開齋.


呢隻鴿不停咁擔啲建築廢料飛上飛落.變咗容易捉到佢路,睇怕佢係築緊巢.


由於勁裁既關係,真係差一吋就一吋,這張裁到接近100%,用85mm影既話應該掉得,就算影得比較大隻既,都係135mm壓倒性勝出,除咗放大率之外,85mm支鏡紫邊太勁,就算軟件開到盡除紫邊,放到咁大高反差位都係死得.


呢張既姿勢幾搞鬼.


講開又講,我一向幾反對特登影細啲然後裁相.今次固然係器材問題唔裁唔得.如果用Canon機再加佢支200mm f1.8應該會正好多.不過有時片幅夠大又冇咁易出界,尤其我等老人家手腳唔協調.呢張其實隻白鴿幾邊吓,用APS-C影多數會出咗界.依家就仲用得.但部機都要對焦點分佈夠闊先有用.否則都難逃一刪.